გარემოსდაცვითი ზედამხედველობის დეპარტამენტის თანამშრომლებმა, ცხოველისადმი სასტიკი მოპყრობის ამსახველ ვიდეოსთან დაკავშირებით, შესაბამისი ღონისძიებები გაატარეს.

სოციალურ ქსელ youtube-ზე გამოქვეყნებული იყო ზუგდიდის მუნიციპალიტეტის სოფელ რიყეში გადაღებული ვიდეო, სახელწოდებით "პაატას სპეცრაზმი. ნადირობა მაჩვზე", რომელიც შეიცავდა ძაღლებით მაჩვზე ნადირობის, ცხოველის წამების, დასახიჩრებისა და მოკვლის ამსახველ კადრებს.

სამეგრელო-ზემო სვანეთის სამმართველოს გარემოსდაცვითი პატრულირებისა და სწრაფი რეაგირების განყოფილების თანამშრომლებმა იდენტიფიცირება მოახდინეს და დაკითხეს ცხოველის წამებაში მონაწილე პირები. ცხოველისადმი სასტიკი მოპყრობის ამსახველი ვიდეოკადრები სოციალური ქსელიდან წაიშალა.

ქმედება შეიცავს საქართველოს სისხლის სამართლის კოდექსით გათვალისწინებული დანაშაულის ნიშნებს, შესაბამისად, მასალები შემდგომი რეაგირებისთვის ზუგდიდის რაიონულ პროკურატურას გადაეგზავნა.