ჯანდაცვის მინისტრის მიერ დაანონსებული ფასების შემცირება არ გამართლდა და მედიკამენტების ნაწილზე ფასების მორიგი ზრდა დაფიქსირდა. „გურიის მოამბე“ დაინტერესდა, როგორ აისახება ეს მოსახლეობის ჯიბეზე და კონკრეტულად რომელი დასახელების მედიკამენტი გაძვირდა.
მედიკამენტების უმეტესი ნაწილი გაძვირდა. აფთიაქებში ბავშვთა კვების საშუალებების დიდი არჩევანია. შესაბამისად, პროდუქციის ხარისხი და ფასიც განსხვავებულია. როგორც რამდენიმე აფთიაქში განაცხადეს, განსაკუთრებით გაძვირებულია რამდენიმე დასახელების საკვები. ნეტრი 01 - ღირებულება 20, 25 თეთრს შეადგენა, ახლა მისი ფასი 24. 50. მალიუტკა კი რომელიც 11.30 ღირდა 13.50 თეთრია.

ოზურგეთში რამდენიმე აფთიაქში აცხადებენ, რომ თითქმის ყველა ტიპის მედიკამენტს ფასი მოემატა. მაგალითად გაძვირებულია სუპრასტინი - რომელიც რამდენიმე თვის წინ 2.80 ღირდა, ახლა კი მისი ღირებულება 3.10. ცეფამედი 19 ღირდა, მისი ღირებულება ახლა 22 ლარს შეადგენს, რაც შეეხება პრედუქტალს თუ მისი შეძენა 24 ლარი გიჯდებოდათ, ახლა 27.80 თეთრის გადახდა მოგიწევთ.
პამპერსებიდან ყველაზე უკეთ თურქული წარმოების ,,ქან ბებე” იყიდება, თუმცა ლარის რყევამ იაფიანი პროდუქციაც გააძვირა. დაახლოებით 3 თვის წინ, თითო საფენის ფასი 30-დან 55 თეთრამდე მერყეობდა, ახლა 0,57 ლარი ღირს.

აფთიაქებში წამალზე ფასების მატებას, ქვეყანაში ლარის გაუფასურებას უკავშირებენ. როგორც მომხმარებლები აცხადებენ, ბოლო დღეებში მათ მედიკამენტების შეძენა გაზრდილ ფასად უწევთ. მათივე ინფორმაციით, წამლებზე ფასმა ძირითადად 1,50 ლარიდან 2 ლარამდე მოიმატა.
,,ჩემი 1 წლის პატარა ხელოვნურ კვებაზე მყავს, პამპერსიც და კვებაც გაგვიძვირდა. არადა, ყველაფერს მოიკლებ, მაგრამ შვილს მშიერს ხომ არ დატოვებ? თვეში ბავშვის შენახვა 572 ლარი გვიჯდება. ეს მხოლოდ საკვებს და პამპერსს რაც შეეხება. კატასტროფული მდგომარეობაა. მთავრობა რომ გაიძახის, დემოგრაფიული მაჩვენებელი უნდა გავაუმჯობესოთ, ქართველი ერი უნდა გამრავლდესო, მარტო თქმა უშველის? ერთი შვილის გაზრდა მიჭირს და მეორეს არ გავაჩენ. მირჩევნია ერთს ყველაფერი ჰქონდეს, ვიდრე რამდენიმეს ბევრი რამ აკლდეს”.

,,მედიკამენტები 20%-ით გამიძვირდა. წნევის წამალი ისე გაძვირდა, რომ ვეღარ ვყიდულობ. არავინ არ ცდილობს მედიკამენტებზე ფასების შემცირებას. საბოლოო ჯამში კი ჩვენისთანა დაბალი ფენა ზარალდება. მაღალი წნევა მაწუხებს, დიაბეტი, ვენების გაგანიერება მაქვს. ექიმის დანიშნული წამლების საერთო ღირებულება 300 ლარს აჭარბებს და იძულებული ვარ, ზოგიერთი წამალი არ ვიყიდო, აი ცხოვრება და ამას ქვია არსებობა?.”

,,ბავშვი რომ შეგვეძინა, ისე გვიხაროდა, გვეგონა ზედიზედ რამდენიმეს გავაჩენდით, მაგრამ ფინანსურად ისე გაგვიჭირდა, ეს გამოგვაზრდევინა, ამას ვოცნებობთ. თითქმის ყოველ მესამე, მეორე დღეს საყიდელი აქვს საჭმელი, წამლები, სველი ხელსახოცები, პამპერსი.“

„ექიმი რომ გეტყვის მაინცდამაინც ის ძვირიანი შეიძინო, ბავშვს არაფერი ავნოთ, არ გამოაყაროსო. რა უნდა ქნა, ბოლო თეთრსაც გაიღებ და პატარას საუკეთესოს მოუტან, ხომაა ასე? ხოდა რა უნდა ვქნა გეკითხები, კაი, სანამ იყო თხილი ქე ვყიდე და ახლა რა გავყიდო. არც მე ვმუშაობ და არც ჩემი მეუღლე. ველოდებით დედამთილის პენსიას.“

ექსპერტების განცხადებით, წინა თვესთან შედარებით, სამომხმარებლო ფასები 0.5%-ით გაიზარდა. სურსათსა და უალკოჰოლო სასმელებზე – 0.7%-ით, ჯანდაცვაზე კი – 2%-ით. სურსათის ჯგუფში ფასები განსაკუთრებით გაიზარდა შემდეგ ქვეჯგუფებში: შაქარი, ჯემი და სხვა ტკბილეული (5,3%), რძე, ყველი და კვერცხი (3%), ბოსტნეული და ბაღჩეული (1.8%).

მათი მონაცემებით, წინა თვესთან შედარებით, ჯანმრთელობის დაცვის ჯგუფში ფასების მნიშვნელოვანი მატება დაფიქსირდა სამედიცინო პროდუქციაზე (8,6%), განსაკუთრებით გაზრდილია მედიკამენტების ფასები.

არჩევნების შემდეგ, ეროვნული ვალუტის მკვეთრად გაუფასურება გარკვეულწილად უკვე აისახა იმპორტირებულ პროდუქციაზე, განსაკუთრებით მედიკამენტების ფასებზე. ეკონომისტების აზრით, იმპორტირებულ პროდუქციაზე ფასები კიდევ უფრო გაიზრდება. ეკონომისტები ვარაუდობენ, რომ წლიური ინფლაცია დაგეგმილ 5%-ს არ გადააჭარბებს, თუმცა, გარკვეულ ჯგუფებზე, სადაც მაღალია იმპორტის წილი, ინფლაციის მაჩვენებელიც გაცილებით მაღალი იქნება.

თეა იოსელიანი-გურია