უკრაინაში რუსეთის სპეცსამსახურების მოთხოვნით ქართველი სამხედრო დააკავეს

უკრაინაში რუსეთის სპეცსამსახურების მოთხოვნით ქართველი სამხედრო დააკავეს - სდლს განცხადება

სამართალი - 15:19, 18 Jan, 2017

19338

„სამართალდამცავთა დაცვის ლიგის“ ინფორმაციით, რუსეთის ფედერაციის სპეცსამსახურებისა და პროკურატურის მოთხოვნის საფუძველზე, 2017 წლის 15 იანვარს, კიევის ჟულიანის აეროპორტში, საქართველოს შს სამინისტროს განსაკუთრებულ დავალებათა დეპარტამენტის შიდა ქართლის სამმართველოს უფროსის ყოფილი მოადგილე, პოლიციის ვიცე–პოლკოვნიკი გიორგი ცერცვაძე დააკავეს.

როგორც "ნიუპოსტს" სდლ- დან აცნობეს, ცერცვაძეს აქტიური მონაწილეობა აქვს მიღებული აფხაზეთსა და შიდა ქართლში, საქართველოს ტერიტორიული მთლიანობისთვის მიმდინარე ბრძოლებში, ხოლო 2008 წელს აქტიურად იბრძოდა საქართველოში შემოჭრილ ოკუპანტთა წინააღმდეგ. განვლილ ბრძოლებში ის არაერთგზის იქნა დაჭრილი. მიღებული აქვს სახელმწიფო ჯილდოები. ვიცე– პოლკოვნიკი გიორგი ცერცვაძე, მოხალისედ იბრძოდა უკრაინის დონეცკის ოლქის ანტიტერორისტულ ზონაში და იქაც გამორჩეული გახლდათ, რუსეთის რეგულარული ჯარის ნაწილების წინააღმდეგ მიმდინარე საბრძოლო მოქმედებებში.
"აღსანიშნავია რუსეთის სპეცსამსახურების მკვეთრი გააქტიურება, საქართველოს იმ მოქალაქეთა მიმართ, რომელებიც თავისი მოღვაწეობით, ეწინააღმდეგებოდნენ ოკუპანტი სახელმწიფოს ინტერესებს. სამწუხაროდ რუსეთის ფედერაცია, ხელოვნურად შეთითხნილი ,,საქმეებით“, ახერხებს მათთვის არასასურველ, საქართველოს მოქალაქეთა ,,სამართებლივ“ დევნას – მათი ხელში ჩაგდების მიზნით. ამ გააქტიურების ნათელი გამოხატულებაა, რუსეთის მოთხოვნით, ლიტვის ტერიტორიაზე, საქართველოს ანტიტერორისტული ცენტრის ყოფილი ხელმძღვანელის ზურაბ მაისურაძის დაკავება, რომელიც ვითარებაში სიღრმისეული გარკვევის შემდეგ, ლიტვის სასამართლოს მიერ განთავისუფლებული იქნა. მაისურაძეს ლიტვაში თავისუფალი გადაადგილების უფლება მიეცა და ასევე განხილვის პროცესშია პოლიტიკური დევნილის სტატუსის მინიჭება.
სამწუხაროდ მაისურაძის ბედზე ზრუნვით თავი არც საქართველოს საგარეო საქმითა სამინისტროს და არც ლიტვაში საქართველოს საელჩოს არ შეუწუხებია.
იმედს გამოვთქვავთ, რომ ბატონი ცერცვაძის შემთხვევაში მაინც დაინტერესედება საქართველოს საგარეო საქმეთა სამინისტრო და საქართველოს საელჩო უკრაინაში და უკრაინის ხელისუფლებასთან მჭიდრო კონტაქტში, არ დაუშვებს საქართველოს მოქალაქის რუსეთისათვის გადაცემას, სადაც მას სასიკვდილო საფრთხე ემუქრება!"- აცხადებენ ორგანიზაციაში.