სასამართლო პროცესზე მოკლული 76 წლის ლუბა ყოჩიაშვილის შვილმა და მისმა შეყვარებულმა ბექა შენგელიამ ბრალი ნაწილობრივ აღიარეს.

"მარიამის დედა ამ ორი ხელით მოვკალი, მე დავახრჩე" - თქვა ბექა შენგელიამ.

მისი თქმით, მოკლულის შვილი ირმა ყოჩიაშვილი "მისი ფსიქიკური ტერორის ქვეშ იმყოფებოდა". შენგელიამ სასამართლოს მიმართა, რომ ყოჩიაშვილის ფსიქიკური მდგომარეობა შეისწავლონ.

"მას თამამად შეიძლება ეწოდოს ჩემი მსხვერპლი, მარიამი დამოუკიდებლად არ მივიდოდა იმ აზრამდე, რომ დედა მოეკლა. ვთხოვ გამოძიებას, შეაფასოს მარიამის ფსიქიკური მდგომარეობა. მარიამის დედობილის გული მის თვალწინ დავაგემოვნე და ის ამას აღტაცებული სახით უყურებდა. ყოველთვის მომწონდა ადამიანზე მანიპულაციის განხორციელება. მე მარიამისგან შევქმენი ესთეტიური მონსტრი. თამამად შეიძლება ეწოდოს ჩემი მსხვერპლი მარიამ ყოჩიაშვილს და იმ არასრულწლოვან გოგონას”, - განაცხადა ბრალდებულმა ბექა შენგელიამ.

სასამართლო პროცესზე ბრალდებულმა აღიარა რომ მარიამ-ირმა ყოჩიაშვილს 13 000 დოლარზე მეტი გამოსძალა.

"მე მარიამზე ვახორციელებდი ფსიქოლოგიურ ტერორს. მე გამოვიყენე მარიამის წინააღმდეგ ფსიქოლოგიური ტერორი. ის იმყოფებოდა ჩემი ფსიქოლოგიური ტერორის ქვეშ და გამოვართვი 13 000 დოლარი",- აღნიშნა ბრალდებულმა.

ამასთან შენგელია დარწმუნებულია, რომ თუ ყოჩიაშვილს აღკვეთის ღონისძიება შეეცვლება, ირმა ყოჩიაშვილის მამის სიცოცხლეს საფრთხე არ ემუარება.

"არავითარი საფრთხე მამის მოკვლის არ არსებობს"- თქვა შენგელიამ.

კანიბალიზმის აღიარების მიუხედავად, შენგელიამ წარდგენილ ბრალში თავს დამნაშავედ მხოლოდ ნაწილობრივ ცნობს.

"მედავებიან ადამიანის სხეულის ორგანოების სხვაგვარად გამოყენებას, რაც არ ჩამიდენია. ის აღარ იყო ცოცხალი და მისი დანაწევრება მოხდა გვამის გადაადგილების მიზნით და არა რაიმე რიტუალური მიზნებისთვის, რაზეც არის საუბარი. ამიტომაც, არ ვთვლი, რომ ეს იყო განსაკუთრებული სისასტიკე. დიახ, სისასტიკე მაინც არის, როცა ადამიანს მოახრჩობ, მაგრამ განსაკუთრებულ სისასტიკეს, რომ სიცოცხლეშივე აწამო სხვაგვარად ამას ადგილი არ ქონია," - აღნიშნა ბრალდებულმა.

ცნობისთვის, 76 წლის ქალის მკვლელობისთვის ბექა შენგელია მარიამ ყოჩიაშვილი და არასრულწლოვანი გოგო სამართალდამცავებმა 4 ნოემბერს დააკავეს.

იმავე დღეს აიყვანეს კიდევ ორი პირი, რომელთაც გამოძიება მკვლელობის შეუტყობინებლობისა და დანაშაულის დაფარვას ედავება.

გამოძიებამ დაადგინა, რომ სამმა ბრალდებულმა, 2016 წლის 19 ოქტომბერს, წინასწარ შემუშავებული დანაშაულებრივი გეგმის თანახმად, თბილისში, ბერი გაბრიელ სალოსის ქუჩაზე მდებარე კორპუსის საცხოვრებელ ბინაში, ამავე მისამართზე მცხოვრები, ბრალდებულ ირმა ყოჩიაშვილის დედა, ლუბა ყოჩიაშვილი ჯერ ელექტროშოკით გათიშეს, ხოლო შემდგომ - გაგუდეს და დანის დარტყმით მოკლეს. ბრალდებულებმა გარდაცვლილის ცხედარი დიდი ზომის ჩანთაში მოათავსეს და თბილისში, ბექა შენგელიას ნაქირავებ ბინაში გადაიტანეს, სადაც გვამი დაანაწევრეს.

იმავე საღამოს, დაბინდების შემდგომ, ბრალდებულებმა დანაწევრებული გვამი ორი ჩანთის მეშვეობით გლდანის N8 საპყრობილის მიმდებარედ არსებულ გაუქმებულ ნაგავსაყრელზე გადაიტანეს, წინასწარ, მოცემული დანაშაულის ჩადენის მიზნით შეძენილი ბენზინი გადაასხეს, ცეცხლი წაუკიდეს და კვალის დასაფარად, თხრილში დაწვეს.

"ნიუპოსტი" საკუთარ წყაროზე დაყრდნობით, წერდა, რომ ეს ერთადერთი საქმეა, სადაც კანიბალიზმის ნიშნები იკვეთებოდა.

დღეს კი 76 წლის ქალის მკვლელობაში ბრალდებულმა კანიბალიზმის ფაქტი აღიარა.