პოლიტიკური გავლენები სასამართლოზე - ნინო გვენეტაძე არასამთავრობოების კრიტიკას პასუხობს

სამართალი - 15:06, 14 Jan, 2017

2447

უზენაესი სასამართლოს თავმჯდომარე ნინო გვენეტაძე იუსტიციის უმაღლესი საბჭოს მიმართ და სასამართლოში პოლიტიკურ გავლენებზე არასამთავრობო სექტორის კრიტიკას გამოეხმაურა.
გვენეტაძის თქმით, პრობლემატურ არასამთავრობო სექტორთან მუშაობა აქტიურად მიმდინარეობს და მომავალშიც გაგრძელდება.

”იუსტიციის უმაღლესი საბჭოს სხდომები ღია და ხელმისაწვდომია ნებისმიერი დაინტერესებული პირისთვის და ასევე ფართო საზოგადოებისთვის. ჩვენ მოვახერხეთ საბჭოს სხდომების პირდაპირი ტრანსლირების უზრუნველყოფა. მაშინ, როდესაც სხდომაზე დასწრების მსურველების რაოდენობა დიდია, ვფიქრობ, 2016 წელს ყველაზე ღია და გამჭვირვალე იყო იუსტიციის უმაღლესი საბჭო. შესაძლებელი იყო საკმაოდ კრიტიკული პოზიციების მოსმენა და კონსენსუსამდე მისვლა, ეს პროცესი ბუნებრივია, გაგრძელდება, რაც ხელს შეუწყობს არასამთავრობო სექტორისა და ჩვენი პოზიციების დაახლოებას მართლმსაჯულების დამოუკიდებლობის უზრუნველსაყოფად”, - განაცხადა ნინო გვენეტაძემ.
გვენეტაძე ირწმუნება, რომ სასამართლო ნებისმიერი ზეგავლენისგან არის თავისუფალი, როგორც სახელისუფლებო შტოების მხრიდან, ასევე სხვა ფორმალური ზეგავლენისგან, რომელიც შეიძლება მომდინარეობდეს სამართალწარმოების პროცესში.

„გახმაურებული საქმეები სასამართლოში მუდმივად არსებობს. საქმეები, სადაც საზოგადოებრივი ინტერესი მუდმივად მაღალია, ჩვენ ამ შემთხვევაში საპროცესო კანონმდებლობით დადგენილი წესით უზრუნველვყოფთ პროცესის გამჭვირვალობას და სრული პასუხისმგებლობით ვაცხადებთ, რომ სასამართლო თავისუფალია პოლიტიკური ზეგავლენისგან, სახელისუფლებო შტოების მხრივაც და ასევე სხვა ფორმალური ზეგავლენისგან, რომელიც შეიძლება ასევე იყოს განხორციელებული სამართალწარმოების პროცესში სასამართლოს მიმართ“, - განაცხადა ნინო გვენეტაძემ.
მისი თქმით, სასამართლოში მთავარი გამოწვევა ადამიანის უფლებებზე ორიენტირებული მართლმსაჯულების უზრუნველყოფაა.

გვენეტაძის განცხადებით, მართლმსაჯულების სისტემაში ასევე გამოწვევად რჩება მოსამართლეთა საკმარისი რაოდენობის უზრუნველყოფა, რომლებიც საქმეთა გაჭიანურების გარეშე დროულ განხილვას უზრუნველყოფენ.

”რაც შეეხება იმ პრობლემებს, რომლებიც მუდმივად და ბუნებრივად ახლავს სამართალწარმოების პროცესებს, ეს იქნება, მაგრამ მათი ეფექტურად დაძლევის გზებზე მუშაობა 2017 წელსაც გაგრძელდება, - განაცხადა ნინო გვენეტაძემ მოსამართლეთა მე-19 კონფერენციის დაწყებამდე.