"ცენტრ პოინტის" საქმე - მაია რჩეულიშვილი დღევანდელი პროცესის გადადებას ითხოვს

სამართალი - 11:45, 12 Jan, 2017

2884

„ცენტრ პოინტის“ დამფუძნებლი და ხელმძღვანელი მაია რჩეულიშვილი ითხოვს, რომ მისი მონაწილეობის გარეშე სასამართლო პროცესები არ ჩატარდეს. შესაბამისი განცხადებას დღევანდელ პროცესზე დაკავებულის ადვოკატები წარადგენენ და პროცესის გადადებას მოითხოვენ.
რჩეულიშვილის უფლებადამცველების თქმით, აღნიშნული განცხადება სასჯელაღსრულების დაწესებულების ადმინისტრაციას სასამართლოსთვის უნდა გადაეგზავნა, თუმცა, როგორც მათ გაარკვიეს, სასამართლოში მაია რჩეულიშვილის განცხადება ჯერჯერობით შესული არ არის.
ადვოკატების ინფორმაციით, მაია რჩეულიშვილმა სასამართლოს ორი განცხადება გაუგზავნა. პირველი განცხადებით, ის თანახმა იყო მისი მონაწილეობის გარეშე ჩატარებულიყო პროცესი, თუმცა, მოგვიანებით, მაია რჩეულიშვილმა მეორე განცხადება დაწერა, რომლითაც ითხოვს, რომ მის გარეშე პროცესი არ ჩატარდეს.

„გუშინ დღის პირველ ნახევარში მაია რჩეულიშვილის ჯანმრთელობის მდგომარეობა გაუარესდა, რა დროსაც მან დაწერა განცხადება იმის შესახებ, რომ თანახმა იყო, პროცესი მისი მონაწილეობის გარეშე ჩატარებულიყო, რათა არ მომხდარიყო სპეკულაციები პროცესის გაჭიანურებაზე, თუმცა დღის მეორე ნახევარში მაია რჩეულიშვილის მდგომარეობა გაუმჯობესდა და მან მეორე განცხადება დაწერა, რომლითაც ის ითხოვს, რომ პროცესი მისი მონაწილეობის გარეშე არ ჩატარდეს. ეს განცხადება გადაეცა ციხის ადმინისტრაციას, რომელსაც სასამართლოსთვის უნდა გადაეგზავნა, თუმცა, როგორც გავარკვიეთ, მეორე განცხადება სასამართლოში შესული არ არის. ჩვენ მოვახსენებთ სასამართლოს მაია რჩეულიშვილის პოზიციას და სასამართლო იმსჯელებს, გადადოს თუ არა დღევანდელი პროცესი იქამდე, სანამ მაია რჩეულიშვილი არ შეძლებს პროცესში მონაწილეობის მიღებას“, - განაცხადა „ცენტრ პოინტის“ დამფუძნებლისა და ხელმძღვანელის ადვოკატმა მარიამ ცუცქირიძემ.