საკონსტიტუციო სასამართლომ, საკონსტიტუციო სასამართლოს შესახებ ორგანულ კანონში პარლამენტის მიერ მიმდინარე წელს შეტანილ ცვლილებებთან დაკავშირებულ ოთხ გაერთიანებულ სარჩელზე გადაწყვეტილება გამოაცხადა.

პლენუმმა ნაწილობრივ დააკმაყოფილა "ნაციონალური მოძრაობის" 38 დეპუტატის, არასამთავრობო ორგანიზაციებისა და ცალკეული მოქალაქეების სარჩელები იმ ნაწილში, რომლის მიხედვითაც საკონსტიტუციო სასამართლოს თავმჯდომარესა და მოადგილეებს თანამდებობაზე მეორე ვადით არჩევის შესაძლებლობა აეკრძალათ. ასევე ნორმა, რომლის მიხედვითაც საკონსტიტუციო სასამართლოს მოსამართლეს ათწლიანი საქმიანობის შემდეგ ავტომატურად უწყდება უფლებამოსილება იმ შემთხვევაშიც, როცა კანონით დადგენილ ვადაში არ არის დანიშნული მისი შემცვლელი.

პლენუმმა ანტიკონსტიტუციურად ცნო ის ახალი რეგულაციაც, რომლის მიხედვით სადაო ნორმის შეჩერება მხოლოდ პლენუმს შეუძლია, ცვლილებამდე ეს შესაძლებლობა კოლეგიასაც ჰქონდა.

ანტიკონსტიტუციურად იქნა ცნობილი ასევე რეგულაცია, რომლის მიხედვით ორგანული კანონის შესახებ გადაწყვეტილების მიღება მხოლოდ პლენუმის 6 წევრის თანხმობით არის შესაძლებელი, მოქმედ რეგულაციამდე გადაწყვეტილების მიღება ორგანული კანონის ანტიკონსტიტუციურად ცნობასთან დაკავშირებით პლენუმის უბრალო ბუმრავლესობას შეეძლო.

სარჩელები არ დაკმაყოფილდა იმ ნაწილში, რომელიც სასამართლოს გადაწყვეტილების ვებ-გვერდზე დაუყოვნებლის გამოქვეყნებას ითვალისწინებს და ასევე პლენუმმა არ მიიჩნია ანტიკონსიტუციურად ის რეგულაცია, რომლის მიხედვით ორგანული კანონი მხოლოდ პლენუმმა უნდა განიხილოს.