12 წელი ოთხოზორიას მკვლელობისთვის - რაშიდ კანჯიოღლი თავისუფალია

სამართალი - 10:46, 27 Dec, 2016

11342

ზუგდიდის რაიონულმა სასამართლომ გიგა ოთხოზორიას მკვლელობაში ბრალდებულ რაშიდ კანჯიოღლის 12 წლით თავისუფლების აღკვეთა მიუსაჯა.

გიგა ოთხოზორიას საქმის განხილვა ზუგდიდის სასამართლომ ოქტომბრის თვიდან დაიწყო. დაიკითხა 50-ზე მეტი მოწმე, მათ შორის მკვლელობის თვითმხილველები. ბრალდების მხარემ სცადა ტელეფონით დაკავშირებოდნენ მკვლელობაში კანჯი ოღლის, რომელმაც სატელეფონო ზარებს არ უპასუხა.

საქმეზე სასამართლო განხილვები ბრალდებულის გარეშე ტარდებოდა. მასზე ქართულ მხარეს ძებნა აქვს გამოცხადებული.

გიგა ოთხოზორიას ოჯახი გამოძიებით უკმაყოფილოა.

მოკლულის დედა, ჯულიეტა ჭანტურია აცხადებს, რომ სასამართლო პროცესზე არც საკმარისი კითხვები დასმულა გარემოებების დასადგენად.

"აღსრულებადია ეს განაჩენი? - არამგონია! ჩემი შვილის მკვლელი თავისუფლად დაიარება. 8 თვე გავიდა მკვლელობიდან და ამ დროის მანძილზე ჩემი მოთხოვნა იყო მკვლელობის გარემოებების დადგენა - რატომ მოხდა მკვლელობა"- აღნიშნა მოკლული ოთხოზორიას დედამ.

ოთხოზორიას ოჯახის ადვოკატი იოსებ ხატიაშვილი აცხადებს, რომ რაშიდ კანჯიოღლის გასამართლებისა და ქართული მხარისთვის გადმოცემის საკითხზე საქართველოს ხელისუფლებამ უნდა იზრუნოს.

"რუსეთის მიერ კონტროლირებად ტერიტორიაზე ჩადენილი მკვლელობით უკვე დაირღვა კონვენციის მეორე მუხლი. შესაბამისად, სტრასბურგის სასამართლოში შევა სარჩელი, რუსეთის ფედერაციის წინააღმდეგ"- აღნიშნა ადვოკატმა.

ძებნილის ადვოკატის მთვარისა ბიგვავას განცხადებით, სხდომებზე არ ყოფილა წარმოდგენილი საკმარისი დოკუმენტური მასალა, რომლის მიხედვითაც რაშიდ კანჯიოღლის იდენთიფიცირება მოხდებოდა .

"გავრცელებულ ვიდეოფირში ნაჩვენებია 4 პიროვნება, რომელთა სახელი და გვარები არსად არ არის ნახსენები. შესაბამისად ეს კითხვის ნიშნებს აჩენს, რომ გამოძიებამ სრულყოფილი გამოძიების ჩატარება ვერ შეძლო"- თქვა ბრალდებულის ინტერესების დამცველმა.

გალის რაიონიდან დევნილი გიგა ოთხოზორია 19 მაისს ხურჩა-ნაბაკევის ადმინისტრაციულ საზღვართან, საქართველოს კონტროლირებად ტერიტორიაზე, 31 წლის გიგა ოთხოზორია ვერაგულად მოკლეს.