"კრიმინალურმა სამყარომ და რუსეთის სპეცსამსახურებმა საჩუქარი მიიღეს" - ახალაიას და "მასტერას" ადვოკატებმა შესაძლოა მოსამართლის გადაწყვეტილება გაასაჩივრონ

სამართალი - 15:08, 21 Dec, 2016

23089

ე.წ ნავთლუღის სპეცოპერაციის საქმეზე მოსამართლის გადაწყვეტილება ადვოკატებმა შესაძლოა გაასაჩივრონ.
როგორც გია დგებუაძის ადვოკატმა, დავით აბესაძემ ჟურნალისტებს განუცხადა, მართალია გია დგებუაძისთვის ბრალის გადაკვალიფიცირება მოხდა, მას წარდგენილი ბრალი განზრახ მკვლელობა გადაუკვალიფიცირდა განზრახ მკვლელობაში დახმარების გაწევაში, თუმცა შესაძლოა მიღებული გადაწყვეტილება მაინც გაასაჩივრონ, რადგანაც ადვოკატის განცხადებით, საქმეში გია დგებუაძის დანაშაული არ იკვეთება.
„ის რეალურად გამართლდა აღმსრულებლობაში, ანუ მას არ უსვრია არც ერთი იარაღიდან პირისთვის, არ განუხორციელებია არც საკონტროლო გასროლა. ის დამნაშავედ იქნა ცნობილი დახმარებისთვის სხვა პირების მიმართ დანაშაულის შესრულებაში. ჩვენი აზრით, ამ კუთხით მტკიცებულებები არასაკმარისია, ვინაიდან დახმარება განზრახ ქმედებაა და ამ შემთხვევაში არ გამოვლენილა დანაშაული. გადაწყვეტილება აუცილებლად გასაჩივრდება”, - განაცხადა გია დგებუაძის ადვოკატმა დავით აბესაძემ.

გადაწყვეტილების გასაჩივრებას არ გამორიცხავს დათა ახალაიას ადვოკატიც. დღევანდელ განაჩენს, ირაკლი ზაქარეიშვილი პოლიტიკურს უწოდებს.

”ეს არ იყო განაჩენი. ეს იყო მოქმედი ხელისუფლების პოლიტიკური გადაწყვეტილება. კრიმინალურმა სამყარომ და რუსეთის სპეცსამსახურებმა კიდევ ერთი საჩუქარი მიიღეს დღევანდელი გადაწყვეტილებით. როდესაც ჩამბარდება დასაბუთებული განაჩენი, შემდგომ მოგახსენებთ გავასაჩივრებთ თუ არა გადაწყვეტილებას. თუმცა აქ არის სამი მოცემულობა. ერთი არის ტრისტან წითელაშვილის ჩვენება, მეორე მოკლული თათუხაშვილის ჩვენება, რომელიც აწამეს და ჩვენება გამოსძალეს და მესამე, ჯონი ჯოხაიძის ჩვენება, რომელმაც კარიერა აიწყო იმის გამო, რომ დათა ახალაიას წინააღმდეგ ცრუ ჩვენება მისცა. არც ერთი მტკიცებულება საქმეში არ მიუთითებს, რომ დათა ახალაიამ დანაშაული ჩაიდინა”, - განაცხადა დათა ახალაიას ადვოკატმა ირაკლი ზაქარეიშვილმა.

კუდ-ის ყოფილი უფროსი დათა ახალაია და ამავე დეპარტამენტის ყოფილი მაღალჩინოსანი გია დგებუაძე, მეტსახელად „მასტერა“ სასამართლომ ნავთლუღის სპეცოპერაციის საქმეზე დამნაშავედ სცნო.