"თუ პოლიციელის მხრიდან ჟურნალისტის ცემის ფაქტი დადასტურდა, ის უმკაცრესად დაისჯება"- შს მინისტრი

სამართალი - 11:16, 19 Dec, 2016

3092

ბორჯომში მომხადარ ფაქტთან დაკავშირებით ჟურნალისტებთან კომენტარი გააკეთა შინაგან საქმეთა მინისტრმა.
გიორგი მღებრიშვილის განცხადებით, "თუ დადასტურდა, რასაც გიორგი გასვიანი ამბობს, პოლიციელი უმკაცრესად აგებს პასუხს".
მინისტრი პირობას დებს, რომ ფაქტის დადასტურების შემთხვევაში რეაგირების გარეშე არ დარჩება.

„როდესაც ის ადამიანი არღვევს კანონს, რომელიც თავად უნდა იცავდეს წესრიგს და სხვებს უნდა მოუწოდებდეს წესრიგისკენ, ამ შემთხვევაში მას კანონი უმკაცრესად დასჯის. მე მას არავითარ შემთხვევაში არ გადავეფარები. თუ თქვენ გადახედავთ ჩემს ე.წ. ბეგრაუნდს, ვერავინ მეტყვის, რომ მე ოდესმე ჩემს რომელიმე თანამშრომელს სუბიექტურად გადავეფარე და ხელი შევუწყვე მის მიერ ჩადენილი დანაშაულის მიჩქმალვაში. თუ დადასტურდა ის, რასაც ეს ადამიანი ამბობს, უმკაცრესად აგებს პასუხს ის პოლიციელი, რომელმაც ეს ჩაიდინა. ამის პირობას გაძლევთ“, - განაცხადა მღებრიშვილმა.

ტელეკომპანია „იბერიას“ წამყვანი გიორგი გასვიანი პოლიციის თანამშრომელს ცემაში ადანაშაულებს.
როგორც შინაგან საქმეთა სამინისტროში აცხადებენ, ფაქტთან დაკავშირებით გენერალურმა ინსპექციამ მოკვლევა დაიწყო.
მომხდართან დაკავშირებით გამოძიება „სისხლის სამართლის კოდექსის“ 126-ე მუხლით დაიწყო, რაც ძალადობას გულისხმობს.