"9 თვის განმავლობაში პროკურატურის პირადი ტყვე ვიყავი" - ე.წ. ფარული ჩანაწერების საქმეზე ბრალდებულები გაათავისუფლეს

სამართალი - 10:38, 09 Dec, 2016

2472

ე.წ. ფარული ჩანაწერების საქმეზე ბრალდებულები - ზურაბ ჯამალაშვილი და ირაკლი ფხალაძე პატიმრობიდან გაათავისუფლეს.
საამართლოს გადაწყვეტილებას საფუძვლად უდევს ის გარემოება, რომ დაკავებულებს 9 თვიანი წინასწარი პატიმრობის ვადა ამოეწურათ.

ირაკლი ფხალაძე აცხადებს, რომ „პროკურატურის პირადი ტყვე იყო".
”9 თვეზე მეტია საქმის არსებითი განხილვა მიმდინარეობს და პროკურატურამ შეგნებულად არ დაკითხა თავისი მოწმეები. რატომ გააკეთა ეს, არ ვიცი. მე ვთვლი, რომ ვიყავი 9 თვის განმავლობაში პროკურატურის პირადი ტყვე. არ მომცეს საშუალება ამ საქმეზე დამოუკიდებელი გამოძიება ჩამეტარებინა და წარმომედგინა ის მტკიცებულებები, რომლებიც ნათელს მოჰფენდა საქმეს. 16 წელია საადვოკატო საქმიანობას ვეწევი და ასეთი სიტუაციები ჩემთვის უცხო არ არის. აქედან გამომდინარე, ვთვლი, რომ გამოძიებას მტკიცებულებები არ აქვს და ალბათ, ამ საქმეზე გამამტყუნებელი განაჩენი არ დადგება”, - განაცხადა ირაკლი ფხალაძემ.

პირადი და ოჯახური საიდუმლოს ხელყოფის ბრალდებით საქართველოს პროკურატურამ მიმდინარე წლის მარტში ხუთი პირის მიმართ სისხლისსამართლებრივი დევნა დაიწყო, მათ შორის, ზურაბ ჯამალაშვილსა და ადვოკატ ირაკლი ფხალაძეზე.

ჯამალაშვილი და ფხალაძე სისხლის სამართლის კოდექსის 157-ე მუხლის პირველი ნაწილით გათვალისწინებული დანაშაულისთვის დააკავეს, რაც პირადი ან ოჯახური საიდუმლოს უკანონოდ მოპოვება, შენახვა, გავრცელებას ეხება.

საქმე ეხება, საზოგადოებისათვის ცნობილი პირების პირადი ცხოვრების ამსახველი ფარული აუდიო და ვიდეო ჩანაწერები მოპოვებას, შენახვასა და გავრცელებას.