"მცირეწლოვანი შვილები და მოხუცი მშობლები მყავს, თუ შემიფარდებთ გირაოს ვითანამშრომლებ გამოძიებასთან"

"მცირეწლოვანი შვილები და მოხუცი მშობლები მყავს, თუ შემიფარდებთ გირაოს ვითანამშრომლებ გამოძიებასთან" - დავით დევნოზაშვილი

სამართალი - 14:20, 08 Dec, 2016

17944

ე.წ. ფოტოგრაფების საქმეზე ბრალდებულმა, შსს-ს კონტრდაზვერვის დეპარტამენტის ყოფილმა მაღალჩინოსანმა დავით დევნოზაშვილმა დღევანდელ სასამართლო პროცესზე განაცხადა, რომ მზადაა გამოძიებასთან თანამშრომლობა გააგრძელოს.
მისი თქმით, ოჯახის ერთადერთი მარჩენალია ამიტომ გირაოს შეფარდებას ითხოვს.

"მყავს მცირეწლოვანი შვილები, რომელთა აღზრდაშიც აქტიურ მონაწილეობას ვიღებ. ასევე მყავს მოხუცი მშობლები და ფაქტობრივად ოჯახის ერთადერთი მარჩენალი ვარ. თუ გაითვალისწინებთ ჩემს პოზიციას და შემიფარდებთ აღკვეთის ღონისძიების სახით გირაოს, მზად ვარ, ვითანამშრომლო გამოძიებასთან. მითუმეტეს, რამდენჯერაც დამიძახეს მთავარ პროკურატურაში, მე არაერთხელ მივსულვარ კეთილსინდისიერად და დასმულ კითხვებზე სრულყოფილი პასუხი გამიცია", - განაცხადა დევნოზაშვილმა.
მისივე თქმით, ის და მისი ოჯახი ამ საქმეზე მასმედიისა და საზოგადოების მხრიდან ზეწოლას განიცდიან, ვინაიდან მასთან სახლში რამდენჯერმე უცნობი ადამიანები იმყოფებოდნენ .

ბრალდებული ირწმუნება, რომ საქმეზე კიდევ ერთ ბრალდებულთან ალექსანდრე მუხაძესთან შეხება არასდროს ჰქონია.
"2009 წლის აჭარის საქმეს რაც შეეხება, ამ საქმეს გრიფით „საიდუმლო“ ადევს. მინდა განვმარტო, რომ იმ საქმეში სრულიად უდანაშაულო ვარ. სასამართლო პროცესები გადადებულია და უკვე მე-7 თვეა არ ჩატარებულა. მორჩილად ველოდები სასამართლო პროცესის გამართვას. ყოველი გამოძახების შემდეგ არაერთხელ ჩავსულვარ აჭარის პროკურატურაში და მიმიცია განმარტებები გამოძიების მსვლელობასთან დაკავშირებით. სასამართლომ მიიჩნია, რომ გირაოთი უნდა ვყოფილიყავი გარეთ და არ შემეფარდა აღკვეთის ღონისძიების სახით პატიმრობა. მე დღესაც ვასრულებ მიცემულ პირობას", - განაცხადა დავით დევნოზაშვილმა.