ლანჩხუთში, მომხდარი მკვლელობის დეტალები

რეგიონები - 15:10, 28 Nov, 2016

28486

"გურიის მოამბისთვის" გუშინ, გვიან ღამით ლანჩხუთში მომხდარი მკვლელობის დეტალები გახდა ცნობილი.

მომხდარის შესახებ მეზობლები საუბრობენ. მათი თქმით, სოფელ ჩიბათში 58 წლის გ. ძნელაძემ მეზობელი, მეგობარი და თანამშრომელი 38 წლის მ. ჯორბენაძე ცივი იარაღით დაჭრა.

შემთხვევა გუშინ მოხდა. თანასოფლელები მიზეზებს ვერ ხსნიან, მომხდარს არც თვითმხილველი ჰყავს. გვიყვებიან მხოლოდ იმას, რომ გარდაცვლილი და მკვლელობაში ეჭვმიტანილი კარგი მეგობრები იყვნენ და გუშინ სუფრაზე ერთად ქეიფობდნენ, რის შემდეგაც ურთიერთშელაპარაკება და ჩხუბი მოუვიდათ.

ნანული ცინცაძე, მეზობელი-არავინმა არ იცის რა მოხდა და რის გამო მოხდა. ამ დილით იპოვეს გარდაცვლილი იმ კაცის ეზოში, ვინც დაკავებულია. თვითმხილველი არ ჰყავს არავინ. მაგ ორს შორის რა მოხდა და რისთვის დატრიალდა ამხელა უბედურება, არ ვიცით.

ნათელა ჯორბენაძე, მეზობელი-გვამი ექსპერტიზაზე წაიყვანეს. სხვა დეტალები არაფერი ვიცით. ერთი უწყინარი ბიჭი იყო, არავის არაფერს არ უშავებდა. ეტყობა უთანხმოება მოუვიდათ ერთმანეთში. ამხანაგობდნენ, ერთად მუშაობდნენ. გარდაცვლილის ორი შვილი დარჩა.

გარდაცვლილი დღეს დილით ეჭვმიტანილის ეზოში იპოვეს. მას ჭრილობა მკლავის არეში აღენიშნება, სავარაუდოდ ის სისხლისგან დაიცალა. მკვლელობაში ეჭვმიტანილი პოლიციას თავისი ნებით დღეს დილით ჩაბარდა.

ადგილზე მუშაობენ ექსპერტ-კრიმინალისტები, გამოძიება 108-ე, განზრახ მკვლელობის მუხლით მიმდინარეობს.

გარდაცვლილი და ეჭვმიტანილი, ლანჩხუთში ჩინურ კომპანიაში ერთად მუშაობდნენ, რომელიც ჯაპანა-გრიგორეთის ავტობანის მშენებლობას აწარმოებს.