ცრუ დასმენის ბრალდება - ზუგდიდში სასამართლოს წინ მოქალაქემ პირი ამოიკერა

სამართალი - 15:12, 25 Nov, 2016

4201

ზუგდიდის რაიონულ სასამართლოს წინ მოქალაქე ოდენა ბარამიამ პროტესტის ნიშნად პირი ამოიკერა. როგორც ამ უკანასკნელმა "ნიუპოსტს" განუცხადა, მას პროკურატურა ცრუ დასმენას ედავება და პატიმრობას ითხოვს,
საქმე ეხება 2016 წელს 4 აპრილს მომხდარ ფაქტს. მოქალაქე ირწმუნება, რომ სენაკი-ნოსირის მონაკვეთზე ავტომობილი გაუფუჭდა და დახმარებისთვის გზაზე გაჩერებულ სამართალდამცავებს მიმართა, პოლიციამაც დახმარება გაუწია, თუმცა მას შემდეგ რაც ბაგირი გაწყდა და სამართალდამცავების ავტომობილი დაზიანდა, პოლიცია მას ფიზიკურად გაუსწორდა, ცემა ნოსირის პოლიციაშიც გაგრძელდა.

მოქალაქის თქმით, გუშინ გაიგო რომ მას პროკურატურამ 273 მუხლის მესამე ნაწილით წაუყენა ბრალი, რაც ცრუ დასმენას გულისხმობს.

”ედიკ სიჭინავამ შემაგინა. მეც პასუხი დავუბრუნე, რის შემდეგაც დამადეს ბორკილები და წამიყვანეს სოფელ ნოსირის სამმართველოში. გზადაგზა მცემდნენ. სიჭინავასთან ერთად ბესიკ გოროზიანიც გამისწორდა ფიზიკურად. ლავიწის ძვალიც მომტეხეს. უკანონო დაკავებისა და ცემისთვის მე სამართალდამცავებს ვუჩივლე და სასამართლო პროცესი მოვიგე, თუმცა 7 თვის შემდეგ საქმე შემომიბრუნეს და ახლა ცრუ დასმენის გამო მიჩივიან. ამ ადამიანებს ვიღაც მფარველობს”, - აცხადებს ოდენა ბარამია რომელმაც შიმშილობა გამოაცხადა.