„თავისუფალმა დემოკრატებმა“ ცესკოს წინააღმდეგ სასამართლოს მიმართეს

სამართალი - 18:53, 24 Nov, 2016

1886

"თავისუფალმა დემოკრატებმა" საქალაქო სასამართლოში სარჩელი შეიტანეს. ოპოზიცია ცენტრალური საარჩევნო კომისიის მიერ გამოქვეყნებულ განკარგულებას ასაჩივრებს, რომელიც პარტიების დაფინანსებას შეეხება.
"საია" და "თავიუსფალი დემოკრატები" თამარ ჟვანიას მიერ გამოცემული განკარგულების გაუქმებას და ახალი განკარგულების გამოცემას მოითხოვენ, სადაც გასწორებული იქნება პარტია "მრეწველობა გადაარჩენს საქართველოს" დაფინანსების საკითხი.

"ეს საქმე ცალსახად ეწინააღმდეგება მოქალაქეთა პოლიტიკური გაერთიანების შესახებ კანონის ოცდამეათე მუხლის მეოთხე და მერვე ნაწილებს. პარტია "მრეწველებისათვის" არ შეიძლებოდა ამ დაფინანსების მინიჭება წლიური 300 000 ლარის ოდენობით, ვინაიდან ეს დაფინანსება ეკუთვნის იმ პარტიას, რომლის წევრიც გახდა პარლამენტის წევრი და რომელმაც შექმნა ფრაქცია პარლამენტში. ამ მოცემულობებს არ აკმაყოფილებს პარტია მრეწველები, მისი წევრი არ გახლდათ ბატონი ნოზაძე, ის იყო ბლოკის უპარტიო წარმომადგენელი მრეწველებისთვის დაფინანსების მინიჭება ასევე ეწინააღმდეგება მერვე მუხლს, რომელიც გამორიცხავს შეკრებას, რაც ამ შემთხვევაში მოხდა და მრეწველებს შეუკრიბეს 2014 წლის თვითმმართველობის არჩევნების შედეგად მიღებული 236 000 და ეს 300 000 ლარი. შავგულიძის განმარტებით, ეს შეკრებაც უკანონო იყო ამ ორი უკანონო მოქმედების შედეგად, ხელოვნურად "მრეწველების" დაფინანსება გახდა 24 000-ით მეტი, ვიდრე ჩვენი და შესაბამისად, ჩვენ დავკარგეთ ცესკო-ში კომისიის წევრების ყოლის უფლება და შეიძინეს მრეწველებმა. სამართლიანობის ლოგიკიდან რომ გამოვიდეთ, "თავისუფალმა დემოკრატებმა" საპარლამენტო არჩვენებში მოვიპოვეთ ხმათა 4,63 % , მრეწველებმა ბლოკში მოიპოვეს 0,78%. მიუხედავად ამისა, ჩვენ ვკარგავთ კომისიის წევრების ყოლის უფლებას.

ეს ემსახურება ძალიან ცუდ მიზანს, "ქართული ოცნების" მიზანს, რომ სრულად გააკონტროლოს საარჩევნო კომისიები, ვინაიდან ამ მანიპულაციებით მოხდება ის, რომ "ქართული ოცნება" შეიყვანს მისგან კონტროლირებად კომისიის წევრებს და ეს არ არის "თავისუფალი დემოკრატების" პრობლემა, ეს არის ჩვენი დემორკატიის პრობლემა. რისთვის სჭირდება მმართველ პოლიტიკურ ძალას ასეთი კონტროლი, პასუხი ერთია - თუ დასჭირდება, რომ გააყალბოს არჩევნები, კომისიის წევრებმა თვალი უნდა დახუჭონ." - განაცხადა შალვა შავგულიძემ.