რუსთავი2-ის საქმეზე უზენაესი სასამართლო 21 ნოემბერს იმსჯელებს

რუსთავი2-ის საქმეზე უზენაესი სასამართლო 21 ნოემბერს იმსჯელებს - რა მოთხოვნები აქვთ იურისტებს

სამართალი - 15:15, 16 Nov, 2016

2045

უზენაესმა სასამართლომ რუსთავი2-ის საჩივრების განხილვის თარიღი დაასახელა. ტელეკომპანიის საქმეზე უმაღლესი სასამართლო ინსტანცია 21 ნოემბერს იმსჯელებს, თუმცა არხის იურისტების შუამდგომლობის მიუხედავად, განხილვას მხარეები არ დაესწრებიან და განხილვა ზეპირი მოსმენის გარეშე მოხდება. აღნიშნულ ფაქტს ტელეკომპანიის იურისტები მიუღებლად მიიჩნევენ.

რუსთავი2-ის იურისტის თამთა მურადაშვილის თქმით, ისინი უზენაესი სასამართლოს მოსამართლეების პატიოსნებისა და პროფესიული ღირსებს იმედად არიან დარჩენილები:

„ეს დავა არაა სუფთად სამართლებრივი, რადგან ამ შემთხვევაში პირველივე ინსტანციაში სულ სხვა გადაწყვეტილება იქნებოდა მიღებული. ამ ლოგიკიდან და გასული პრაქტიკიდან გამომდინარე შესაძლოა გადაწყვეტილება არ იყოს სამართლიანი და დადგეს სიტყვის თავისუფლების საწინააღმდეგო განაჩენი რეალურად. გარკვეული იმედი მაინც არის, რომ უზენაესი სასამართლოს მოსამართლეები, რომელთაც ამხელა ტვირთი აწევთ და პასუხისმგებლობა აქვთ, ვართ მათი პატიოსნებისა და პროფესიული ღირსებს იმედად დარჩენილები“- განაცხადა თამთა მურადაშვილმა.

რუსთავი2-ის ადვოკატის დიტო საძაგლიშვილის განცხადებით, საქმეზე სამართლიანი გადაწყვეტილების შემთხვევაში, ის ქვედა ინსტანციებში უნდა დაბრუნდეს:

„გამომდინარე იქიდან, რომ უზენაესმა სასამართლომ რეალურად ცნო ქვედა ინსტანციებში საპროცესო დარღვევების ფაქტი, რუსთავი2-ის საქმესთან დაკავშირებით. წესით და რიგით მან საქმის განხილვა ქვედა ინსტანციაში უნდა დააბრუნოს. თუმცა გამორიცხული არაა, რომ სხვა გარე გადაწყვეტილება იქნეს მიღებული, გამომდინარ იქიდან, რომ რ2-ის საქმე თავიდანვე არ იყო სამართლებრივი დავა კერძო პირებს შორის, არამედ იყო პოლიტიკური საქმე. შესაბამისად ახლა ყველაფერი დამოკიდებულია იმაზე რამდენად პრიციპულები იქნებიან უზენაესი სასამართლოს მოსამართლეები“- განაცხადა დიტო საძაგლიშვილმა.

საქმის მათ სასარგებლოდ გადაწყვეტის იმედი აქვს ქიბარ ხალვაშის მხარეს. ხალვაშის უფლებადამცველი საქმის ზეპირი მოსმენის გარეშე განხილვაში პრობლემას ვერ ხედავს.