"ჩემი შტაბის ხელმძღვანელი და დამკვირვებლები ყველა გაიყიდა"...აკაკი ჩხაიძის პირველი კომენტარი

რეგიონები - 16:45, 02 Nov, 2016

7115

ლანჩხუთ-ჩოხატაურის გაერთიანებულ მაჟორიტარულ ოლქში დამოუკიდებელი დეპუტატობის კანდიდატი, აკაკი ჩხაიძე მეორე ტურის შედეგებთან დაკავშირებით "გურიის მოამბესთან" პირველ, ვრცელ კომენტარს აკეთებს.

ჩხაიძის განმარტებით, ლანჩხუთსა და ჩოხატაურში არჩევნები გაყალბდა, მისმა კონკურენტმა კი ამომრჩევლების მოსყიდვაზე დიდი თანხა დახარჯა:

"მოლოდინი მქონდა გამარჯვების. მე ფაქტიურად ყველა გამოკითხვა და რეიტინგი მარწმუნებდა, რომ მეორე ტურში არ დავმარცხდებოდი. გურიასთან ჩემი სიახლოვე, გაკეთებული საქმეები, მაძლევდა იმის იმედს, რომ წარმატებას მივაღწევდი, მაგრამ, რაც ჩემმა კონკურენტმა ქალბატონმა წილოსანმა და მამამისმა იკადრეს, მსგავსი რამ არც მინახავს და არც გამიგონია. ვერ წარმოვიდგენდი თუ დეპუტატობისთვის ამდენ სიბინძურეს გააკეთებდნენ. იყიდეს ყველა, დაწყვებული ჩემი შტაბიდან, დამთავრებული დამკვირვებლებით. შტაბის ხელმძღვანელი, ვახტანგ გაჩეჩილაძე არჩევნებამდე 5 დღით ადრე საერთოდ დამემალა და აღარ გამოჩენილა. დამკვირვებლებს თითი არ გაუნძრევიათ არჩევნების დღეს. არ მოველოდი ასეთ მდაბიო საქციელს.

არჩევნების დღეს, მთელი უბნები, ლანჩხუთშიც და ჩოხატაურშიც შემოვიარე და იმდენად დაბალი აქტივობა იყო, ვიფიქრე, ორივე მუნიციპალიტეტში 5 ატასი ამომრჩეველიც არ იქნება-მეტქი. 5 საათზე დადეს მონაცემები, 9 ათასი მოვიდაო, 8 საათისთვის კი 27 ატასიო. ეს არის გამორიცხული. ისეთი კოკისპირული წვიმა იყო, გარეთ ვერ გამოდიოდა ვერავინ. უბრალოდ ჩაყარეს ბიულეტინები. მოისყიდეს ამომრჩევლები, ჩემი მხარდამჭერები და ამის შედეგებზე იზეიმეს გამარჯვება. პირდაპირ გეუბნებით, ამ ხნის კაცი ვარ და მსგავსი არც კი გამიგონია არაფერი, რაც გურიაში მოხდა"-გვითხრა ჩხაიძემ.

"გურიის მოამბე" დაუკავშირდა დეპუტატობის კანდიდატის ჩოხატაურის შტაბის ხელმძღვანელს, ვახტანგ გაჩეჩილაძეს: "ეს გითხრათ ჩემზე ბატონმა აკაკიმ? ასეთი წარმოდგენა აქვს ჩემზე? ღმერთმა ხელი მოუმართოს. მე არაფერს არ ვიტყვი, არანაირ კომენტარს სხვას არ გავაკეთებ. უბრალოდ, მოიკითხეთ მასთან, საერთოდ გადაწყვეტილად რატომ ვერ ამბობდა, აგრძელებდა თუ არა ბრძოლას მეორე ტურში. მე იქ არც დავდიოდი. მონახაზი, ყველაფერი მქონდა გაკეთებული, მაგრამ არავის დაუძახია"

_კი მაგრამ, ბატონო ვახტანგ, მე როცა დაგირეკეთ აკაკი ჩხაიძის გადაცეაში მოწვევასთან დაკავშიებით, ხომ მითხარით, რომ შტაბში იყავით და დაელაპარაკებოდით ბატონ აკაკის?

_ ასე არ იყო. მე გითხარით, გადაწყვეტილებას დაველოდები მეტქი. მე არასოდეს არ გავყიდულვარ და კითხეთ შტაბის სხვა წევრებს ვინ ვარ და გეტყვიან.-გვითხრა გაჩეჩილაძემ.

აკაკი ჩხაიძე მეორე ტურში, "ოცნების" კანდიდატს, ნინო წილოსანს დაუპირისპირდა და დიდი სხვაობით დამარცხდა.

ავტორი: თეა იოსელიანი.