ტრანსგენდერი ქალის მკვლელობის მცდელობაში ბრალდებულს პატიმრობა შეუფარდეს

ტრანსგენდერი ქალის მკვლელობის მცდელობაში ბრალდებულს პატიმრობა შეუფარდეს - დამატებითი დეტალები სასამართლოდან

სამართალი - 13:20, 19 Oct, 2016

6621

თბილისის საქალაქო სასამართლომ ტრანსგენდერი ქალის განზრახ მკვლელობის მცდელობაში ბრალდებულს აღკვეთის ღონისძიების სახით პატიმრობა შეუფარდა. აღნიშნულ საქმეზე გამოძიება საქართველოს სისხლის სამართლის კოდექსის 19-108 (განზრახ მკვლელობის მცდელობის) მუხლით მიმდინარეობს, ტრანსგენდერი ქალის ადვოკატი, ციალა რატიანი 53-ე მუხლის გამოყენების მოთხოვნასაც აყენებს, რომელიც ითვალისწინებს დანაშაულის ჩადენას რასის, კანის ფერის, ენის, სქესის, სექსუალური ორიენტაციის, გენდერული იდენტობისთვის.

პროკურორ ანა სიგუას განცხადებით, ამ ეტაპზე დამამძიმებელი გარემოების 53-ე მუხლის გამოყენების საჭიროება არ იკვეთება, რადგან ბრალდებული დაზარალებულს 2011 წლიდან იცნობდა, ისინი ერთად იხდიდნენ სასჯელს. ამიტომ ბრალდებულისთვის კარგად იყო ცნობილი დაზარალებულის გენდერული იდენტობის შესახებ. პროკურატურის წარმომადგენლის განცხადებით მოწმეთა დაკითხვის შედეგად ცნობილი ხდება, რომ ბრალდებულს დისკრიმინაციული განცხადება არასდროს გაუკეთებია.

პროკურატურის თქმით, საქმის მასალებიდან ირკვევა, რომ ბრალდებული პანელზე მივიდა და დაზარალებელს უთხრა, მისი შეყვარებულისთვისაც მიეცა პანელზე მუშაობის უფლება. ამის შემდეგ ღია სივცეში მოხდა თავდასხმა, ბრალდებულმა დაზარალებულს ბეტონი ჩაარტყა, შემდეგ ცივი იარაღი გამოიყენა.

პროკურორმა პატიმრობის გამოყენების მოთხოვნის მიზეზად დაასახელა ის, რომ ბრალდებული წარსულში ნასამართლევია და აღნიშნული დანაშაულის ჩადენის შემდეგ მიმალვაში იმყოფებოდა, არსებობს საფრთხე, რომ მან თავი აარიდოს მართლმსაჯულებას და სცადოს მტკიცებულებების განადგურება. პროკურორმა ასევე აღნიშნა, რომ საქმის ერთ-ერთი მთავარი მოწმე ბრალდებულისგან ორსულადაა და გამორიცხული არაა, თავისუფლებაზე ყოფნის შემთხვევაში ბრალდებულმა რაიმე სახის ზემოქმედება მოახდინოს ამ ადამიანზე.

ბრალდებულმა გიორგი მურჯიკნელმა სასამართლოს მისი გათავისუფლება გირაოს 1000 ლარის შეფარდების საფუძველზე მოსთხოვა, თუმცა სასამართლომ იმ მოტივით, რომ ბრალდებულს მძიმე დანაშაულის ჩადენაში ედება ბრალი და იქედან გამომდინარე, რომ მან დანაშაულის ჩადენის შემდეგ მიმალვა სცადა მურჯიკნელის მოთხოვნა არ გაითვალისწინა.