გია ლორთქიფანიძეს 26 მაისის საქმეზე პატიმრობა შეეფარდა

სამართალი - 16:45, 28 Sep, 2016

2524

შინაგან საქმეთა მინისტრის ყოფილ მოადგილეს გია ლორთქიფანიძეს 2011 წლის 26 მაისის აქციის დარბევის საქმეზე აღკვეთის ღონისძიების სახით პატიმრობა შეეფარდა.

სასამართლოს გადაწყვეტილებით, ლორთქიფანიძისთვის აღკვეთის ღონისძიების სახით, შეფარდებული მოსამართლის გადაწყვეტილებით, პატიმრობის ვადის ათვლა ბრალდებულის დაკავების მომენტიდან დაიწყება.
შს მინისტრის ყოფილი მოადგილის საქმეზე წინასასამართლო სხდომა 12 ნოემბერს, 11:00 საათზე ჩაინიშნა.

სასამართლოს გადაწყვეტილებაზე განცხადება მთავარმა პროკურატურამაც გაავრცელა:

პროკურატურა გიორგი ლორთქიფანიძისთვის აღკვეთის ღონისძიების სახით პატიმრობის შეფარდების შესახებ განცხადებას ავრცელებს.

”ჩატარებული გამოძიებით დადგინდა, რომ 2011 წლის 26 მაისს რუსთაველის გამზირზე შეკრებილი მომიტინგეების დარბევა და მათი მასობრივი დაკავება, შს ყოფილი მინისტრის ივანე მერაბიშვილის ბრძანებით დაევალა მის მოადგილეს გიორგი ლორთქიფანიძეს. დანაშაულებრივი გეგმის სისრულეში მოყვანის მიზნით, 2011 წლის 25 მაისს, ჯერ კიდევ მიტინგისთვის სანქცირებული ვადის გასვლამდე, პოლიციამ წინასწარ გადაკეტა რუსთაველის გამზირი და მის მიმდებარედ არსებული ქუჩები, ხოლო თავისუფლების მოედანი გადაიკეტა კონსტიტუციური უსაფრთხოების დეპარტამენტისა და შს სამინისტროს სხვა დანაყოფების მეშვეობით, რომელთაც ადგილზე ხელმძღვანელობდნენ გიორგი ლორთქიფანიძე და დავით ახალაია. სწორედ დასახელებულ პირთა მეთაურობით, მშვიდობიანი მომიტინგეების წინააღმდეგ გამოყენებულ იქნა გაუმართლებლად არათანაზომიერი და გადაჭარბებული ძალა. შედეგად, გარდაიცვალა ორი ადამიანი, დასახიჩრდა და ჯანმრთელობის სხვადასხვა ხარისხის დაზიანებები მიიღო დაახლოებით 250-მდე ადამიანმა, ხოლო უკანონოდ დაკავებული იქნა 800-მდე მომიტინგე.

ვინაიდან გიორგი ლორთქიფანიძე თავს არიდებდა გამოძიებას, მას დაუსწრებლად წარედგინა ბრალდება საქართველოს სისხლის სამართლის კოდექსის 333-ე მუხლის მე-3 ნაწილის ,,ბ“ ქვეპუნქტით, რაც სასჯელის სახედ და ზომად ითვალისწინებს თავისუფლების აღკვეთას 5-დან 8 წლამდე ვადით”.

შეგახსენებთ, რომ ამავე საქმეში ბრალდებულების ლევან ქარდავასა და ვასილ ლელუაშვილის მიმართ სხვა სისხლის სამართლის საქმეებზე დამდგარია სასამართლოს გამამტყუნებელი განაჩენი, ხოლო ბრალდებულებს დათა ახალაიასა და რევაზ შიუკაშვილს ასევე სხვა სისხლის სამართლის საქმეებზე აღკვეთის ღონისძიების სახით შეფარდებული აქვთ პატიმრობა. აღნიშნულის გათვალისწინებით, პროკურატურამ ხსენებულ ბრალდებულებთან დაკავშირებით სასამართლოს მხოლოდ წინასასამართლო სხდომის თარიღის განსაზღვრის შუამდგომლობით მიმართა”, - ნათქვამია პროკურატურის მიერ გავრცელებულ განცხადებაში.