"მომიტანეთ რვეული, რატომ არ არის ამოღებული?" - ადვოკატი სტურუას საქმის ახალ გარემოებაზე საუბრობს

სამართალი - 10:25, 16 Sep, 2016

8078

სამტრედიის ყოფილი პოლიციელის, ბრალდებულ გოდერძი თევზაძის ადვოკატი მისი დაცვის ქვეშ მყოფის უდანაშაულობაზე საუბრობს და აცხადებს, რომ არ არის გამორიცხული, დემურ სტურუა მოკლული იყოს და ამ საქმეში გოდერძი თევზაძის დადანაშაულება კონკრეტულ პირებს სურდეთ.

"ამ საქმის ყველა ვერსია, თითოეული დეტალი გამოძიებამ უნდა შეისწავლოს. თუ წერილი დატოვა ამ ბავშვმა, სად დაწერა? - სახლში ხომ? ფურცელი რომელიღაცა რვეულიდან ამოხია, მომიტანეთ ეს რვეული, რატომ არ არის ამოღებული? აუცილებლად უნდა ჩატარდეს ალტერნატიული სასამართლო-სამედიცინო ექსპერტიზა, რომ სტურუას მისი ხელით გაეკეთებინა კვანძები"- აცხადებს ადვოკატი ლედი ტუკვაძე.

მკვლელობის ვერსიას არ იზიარებენ სტურუას ოჯახში და აცხადებენ, რომ ის თვითმკვლელობამდე სწორედ პოლიციელის ზეწოლამ მიიყვანა.

ქუთაისის საქალაქო სასამართლომ ძალაში დატოვა 30 აგვისტოს გადაწყვეტილება, რომლის მიხედვითაც თევზაძეს აღკვეთის ღონისძიების სახით პატიმრობა შეეფარდა.

სამტრედიის პოლიციის ყოფილი თანამშრომლის მიმართ სისხლის სამართლის საქმე ორი მუხლით არის აღძრული, თვითმკვლელობამდე მიყვანა და სამსახურებრივი მოვალეობის ძალადობრივი გადამეტება.

დაცვის მხარე სასამართლოს გადაწყვეტილების გასაჩივრებას სააპელაციო წესით აპირებს.