საკონსტიტუციო სასამართლოს ოთხ წევრს უფლებამოსილება 30 სექტემბერს ეწურება. ჯერჯერობით უცნობია მოასწრებს თუ არა პლენუმი გახმაურებული საქმეების გადაწყვეტას.

ტელეკომპანია „რუსთავის 2“-ის სარჩელზე განხილვები დასრულებულია, მოსამართლეები კი სათათბიროში იმყოფებიან. რაც შეეხება ე.წ. კაბელებისა და გიგი უგულავას გაერთიანებულ საქმეს ორი სხდომის ჩაშლის შემდეგ განხილვის თარიღი უცნობი რჩება. აღსანიშნავია, სხდომები იმიტომ ჩაიშალა, რომ მოსამართლეთა პლენუმი არ შედგა. იმ შემთხვევაში თუ არსებული შემადგენლობის პირობებში გადაწყვეტილებები არ გამოცხადდება, შესაძლოა განხილვა თავიდან დაიწყოს.

აღნიშნულის შესახებ კომენტარს საკონსტიტუციო სასამართლოს თავმჯდომარე აკეთებს და აცხადებს, რომ „ადამიანი იმედით ცხოვრობს“:

„კანონმდებლობით მოსამართლეთა სათანადო რაოდენობა უნდა იყოს იმისათვის, რომ პროცესები განხორციელდეს, ვფიქრობ რომ კოლეგებთან ერთად შევჯერდებით, მე იმედი ამქვს, რომ ეს სიტუაცია დარეგულირდება, ადამიანი იმედით ცხოვრობს, ჯერ კიდევ სამი კვირაა, სამ კვირაში ბევრი რამის გაკეთება შეიძლება, ბევრი რამის ვერა“, - განაცხადა გიორგი პაპუაშვილმა.