"თავში ძლიერად დამარტყეს, მათრიეს და იარაღი ჩამიდეს" - ოჯახიშვილს სასამართლომ პატიმრობა შეუფარდა

სამართალი - 17:11, 09 Sep, 2016

6405

იარაღის შეძენა-შენახვა-ტარების ბრალდებით დაკავებული 27 წლის სპორტსმენს მინდია ოჯახიშვილს ბათუმის საქალაქო სასამართლომ აღკვეთის ღონისძიების სახით პატიმრობა შეუფარდა.
დღევანდელ პროცესზე ასევე ცნობილი გახდა, რომ ოჯახიშვილს ბრალი დაუძიმდა, მართლმსაჯულება ბრალდებულს ნარკოტიკული ნივთიერების შენახვასა და პოლიციელებისთვის წინააღმდეგობის გაწევასაც ედავებიან.

მოსამართლის გადაწყვეტილებას სასამართლო დარბაზში ხმაური მოჰყვა, მოგვიანებით დაკავებულის დედა შეუძლოდ გახდა.

ოჯახიშვილების ინფორმაციით, 27 წლის ახალგაზრდას პოლიციამ იარაღი ჩაუდო, და ფიზიკურად გაუსწორდა.

განცხადება სასამართლო დარბაზშივე გააკეთა თავად მსჯავრდებულმაც:

"პატრულის ეკიპაჟმა გამაჩერა, შემდეგ კი ორი პოლიციელი მოვიდა, ერთმა კარი გამოაღო და მითხრა - ჩაჯდა მანქანაში და ხელები დააწყე საჭესთან. 15 წუთში მოვიდა პოლიციის რამდენიმე მანქანა და ბევრი პოლიციელი. ჩემს მანქანასთან მოვიდა ერთ-ერთი, გამოაღო ჩემი მხრიდან კარი და ძლიერად დამარტყა თავში, რის გამოც ინერციით გადავწექი მეორე სავარძლისკენ. ამ დროს ვიგრძენი, რომ მაისურს მიღმა რკინის მეტალი შემეხო. ვიყვირე, ბიჭო, რას მიკეთებთ. ამ დროს ერთმა კისერზე მომქაჩა, ერთმა ფეხზე, მანქანიდან გადათრევის დროს თავი მიმარტყმევინეს, რის გამოც წამიერად გონებაც დავკარგე, ჩავვარდი ძირს, ვყვიროდი იარაღს რატომ მიდებთ. ამ დროს მოხდა ფიზიკური შეურაცხყოფა, ჰაერში ამწიეს როგორც მიცვალებულს ასწევენ ისე ვყავდი რვა პოლიციელს ჰაერში ატაცებული. ვყვიროდი, გარშემო მყოფ ხალხს ვეუბნებოდი, რომ იარაღს მიდებდნენ და დამხმარებოდნენ", - აღნიშნა მინდია ოჯახიშვილმა.