შსს-მ ოჯახიშვილის ახლობლების წინააღმდეგ გამოძიება დაიწყო

სამართალი - 17:59, 07 Sep, 2016

6115

შინაგან საქმეთა სამინისტრო 27 წლის მოჭიდავეს მინდია ოჯახიშვილის დაკავებასთან დაკავშირებით განმარტებას აკეთებს.

როგორც "ნიუპოსტს" უწყებიდან აცნობეს, დაკავებულს ხეულზე მნიშვნელოვანი ტრავმული დაზიანებები არ აღენიშნებოდა.
"შსს-ს აჭარის პოლიციის დეპარტამენტის ხელვაჩაურის რაიონული სამმართველოს თანამშრომლებმა, ოპერატიული ინფორმაციის საფუძველზე ჩატარებული საგამოძიებო მოქმედებების შედეგად, ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების ბრალდებით, საქართველოს სსკ-ის 236-ე მუხლის მე-2 ნაწილის თანახმად, 1988 წელს დაბადებული მინდია ო. ბათუმში დააკავეს. სამართალდამცველებმა, დაკავებულის პირადი ჩხრეკისას, „ BLOW COMPACT MOD. 2002“-ის მოდელის პისტოლეტი და 6 ვაზნა ამოიღეს. ასევე, ამოღებულია 1,3128 გრ ახალი ფსიქოაქტიური ნივთიერება, რომელიც, ექსპერტიზის დასკვნით, კანაბინომიმეტურად მოქმედ ქიმიურ ნაერთთა კლასს მიეკუთვნება. დაკავებულს მრავალპროფილური სამედიცინო გამოკვლევა ჩაუტარდა. ჯანმრთელობის მდგომარეობის შესახებ ცნობის თანახმად, მას ჯანმრთელობის პრობლემები და ასევე, სხეულზე მნიშვნელოვანი ტრავმული დაზიანებები არ აღენიშნებოდა. შესაბამისად, მისი საავადმყოფოში დარჩენის საფუძველი არ არსებობდა"- აღნიშნავენ შს უწყებაში.
რაც შეეხება ბათუმის რეფერალურ საავადმყოფოს ეზოში მომხდარ ფაქტს, უწყება აცხადებს, რომ ოჯახიშვილის ახლობლემა ექიმი სცემეს, შესაბამისად უწყებამ ფაქტთან დაკავშირებით ბათუმის საქალაქო სამმართველოში გამოძიება დაიწყო.
"პარალელურად, ბათუმის რეფერალური საავადმყოფოს ეზოში შეიკრიბნენ მინდია ო.-ს ოჯახის წევრები და ახლობლები, რომლებიც დაკავებულის ნახვას ითხოვდნენ, რაც კანონით აკრძალულია. სამართალდამცველებმა ბრალდებული კლინიკიდან გაწერის შემდეგ დროებითი მოთავსების იზოლატორში გადაიყვანეს. ბრალდებულის ახლობლები საავადმყოფოში შეიჭრნენ. სამედიცინო პერსონალის განმარტების შემდეგ, რომ დაკავებული უკვე აღარ იმყოფებოდა კლინიკაში, ისინი სიცრუეში დაადანაშაულეს და ერთ-ერთ ექიმს სიტყვიერი და ფიზიკური შეურაცხყოფა მიაყენეს. ექიმის ცემის ფაქტთან დაკავშირებით ბათუმის საქალაქო სამმართველოში გამოძიება საქართველოს სისხლის სამართლის კოდექსის 125-ე მუხლით დაიწყო"- ნათქვამია განცხადებაში.