ბრალდებულ გიორგი ყანჩაველს პატიმრობა შეეფარდა

სამართალი - 12:33, 06 Sep, 2016

2647

თბილისის საქალაქო სასმართლომ მთავარი პროკურატურის შუამდგომლობა გაითვალისწინა და იარაღის უკანონო შენახვა-შეძენა-ტარებაში და ნარკოტიკების უკანონო შეძენა-შენახვაში ბრალდებულ გიორგი ყანჩაველს 2 თვიანი წინასწარი პატიმრობა შეუფარდა.

პროკურორის განცხადებით, არსებობდა ყანჩაველის მხრიდან მიმალვის და მტკიცებულებათა მოპოვებაში ხელის შეშლის საშიშროება.

„სასამართლომ გაიზიარა ბრალდების მხარის არგუმენტაცია პატიმრობის გამოყენებასთან დაკავშირებით და ბრალდებულ გიორგი ყანჩაველს აღკვეთის ღონისძიების სახით, პატიმრობა შეუფარდა. არსებობდა მისი მიმალვის, დანაშაულებრივი საქმიანობის გაგრძელების და მტკიცებულებათა მოპოვებაში ხელის შეშლის საშიშროება“, - განაცხადა პროკურორმა ვაჟა თოდუამ.

გიორგი ყანჩაველი, გიორგი ფეიქრიშვილი და ნოდარ ნიშნიანიძე წინა კვირას დააკავეს. შსს-ს ცნობით, გიორგი ყანჩაველის პირადი ჩხრეკისას სამართალდამცველებმა პისტოლეტი, მჭიდითა და 4 ცალი ვაზნით; ასევე, სავარაუდოდ, ნარკოტიკული საშუალების შემცველი 4 ცალი თეთრი ფერის აბი და 2 ცალი თეთრი ფერის აბის ნატეხი ამოიღეს. ყანჩაველის ავტომანქანის ჩხრეკისას სამართალდამცველებმა 24 ცალი ვაზნა ამოიღეს.
სასამართლო ამ წუთებში კიდევ ერთი დაკავებულის გიორგი ფეიქრიშვილისთვის აღკვეთის ღონისძიების შეფარდების საკითხზე მსჯელობს. დღესვე გაიმართება ნოდარ ნიშნიანიძის სასამართლო პროცესი. ადგილზე ბრალდებულების ახლობლები არიან შეკრებილები და აქციას მართავენ. მათი თქმით, ახალგაზრდები პოლიტიკური ნიშნით დააკავეს.