საჩივრის არცნობის შემთხვევაში, უზენაესი სასამართლო ნაჯახით მართლმსაჯულების განხორციელებას გააგრძელებს

საჩივრის არცნობის შემთხვევაში, უზენაესი სასამართლო ნაჯახით მართლმსაჯულების განხორციელებას გააგრძელებს - ადვოკატი

სამართალი - 10:56, 05 Sep, 2016

2025

„რუსთავი 2“- ის ადვოკატების თქმით, გუშინ გასაჯაროებული სკანდალური დოკუმენტის მიხედვით, ნათელი გახდა, რომ ტელეკომპანია ქიბარ ხალვაშს არასდროს ეკუთვნოდა.

“გავრცელებული დოკუმენტის მიხედვით, უკვე ცნობილი გახდა, რომ თურმე ქიბარ ხალვაშის არასოდეს ყოფილა რუსთავი 2-ის წილები. შესაბამისად, კიდევ უფრო ნათელი გახდა ის გარემოება, რომ ვერც ერთ შემთხვევაში ვერ შეიძლება მიეკუთვნოს რუსთავი 2-ის წილები მას. ეს დოკუმენტი კიდევ ერთხელ ხაზს უსვამს იმ გარემოებას, რომ უზენაესმა სასამართლომ აუცილებლად დასაშვებად უნდა ცნოს ჩვენი საკასაციო საჩივარი და შემდეგ უკვე იმსჯელოს ჩვენი საკასაციო საჩივრის მოთხოვნის დაკმაყოფილებაზე. სხვა შემთხვევაში გამოვა, რომ უზენაესი სასამართლო გააგრძელებს ნაჯახით მართლმსაჯულების განხორციელებას, რაც არის ყოვლად დაუშვებელი და უკანონო,“- განაცხადა ადვოკატმა დიმიტრი საძაგლიშვილმა.

უზენაესმა სასამართლომ რუსთავი 2–ის საკასაციო საჩივრის დასაშვებობის საკითხი დღეს უნდა განიხილოს.

რუსთავი 2-ის ადვოკატებს დღეს უზენაეს სასამართლოში მიაქვთ დოკუმენტი, რომლის საფუძველზეც, მათი მტკიცებით, ტელეკომპანიის წინააღმდეგ მიმდინარე სასამართლო დავა აბსურდული ხდება.

საუბარია ქიბარ ხალვაშსა და ირაკლი ოქრუაშვილს შორის 2010 წლის გერმანიაში გაფორმებულ ხელშეკრულებაზე, რომლის მიხედვითაც ბიზნესმენი, რომელიც რუსთავი 2-ზე პრეტენზიას აცხადებს, თავად აღიარებს, რომ სამაუწყებლო კომპანიის ყველა უფლება ირაკლი ოქრუაშვილს ეკუთვნის.