ყოფილი პარლამენტარის, ნოდარ მოდებაძის მკვლელობაში ბრალდებული დააკავებულია

სამართალი - 11:12, 12 Aug, 2016

19652

შინაგან საქმეთა სამინისტრომ ყოფილი პარლამენტარის, ნოდარ მოდებაძის მკვლელობის ბრალდებით 20 წლის ახალგაზრდა დააკავა.
როგორც "ნიუპოსტს" მღებრიშვილის უწყებიდან აცნობეს, დაკავებულის პირადი ჩხრეკისას, დანაშაულის ჩადენის იარაღი ნივთმტკიცებად ამოიღო.

„შსს-ს კახეთის პოლიციის დეპარტამენტის თანამშრომლებმა, ჩატარებული ოპერატიულ-სამძებრო და საგამოძიებო ღონისძიებების შედეგად, 1996 წელს დაბადებული, წარსულში ნასამართლევი ა. ზ. განზრახ მკვლელობის ბრალდებით დააკავეს.

გამოძიებამ დაადგინა, რომ ბრალდებულმა თელავის რაიონის სოფელ აკურაში, ურთიერთშელაპარაკებისას, სანადირო თოფიდან გასროლით სასიკვდილო ჭრილობები მიაყენა 1950 წელს დაბადებულ ნ.მ.-ს და მიიმალა. დაჭრილი შემთხვევის ადგილზე გარდაიცვალა. სამართალდამცველებმა ა. ზ. მომხდარიდან რამდენიმე დღეში დააკავეს. პოლიციამ, დაკავებულის პირადი ჩხრეკისას, დანაშაულის ჩადენის იარაღი ნივთმტკიცებად ამოიღო“, - აცხადებენ შსს-ში.

გამოძიება განზრახ მკვლელობის ფაქტზე, საქართველოს სსკ-ს 108-ე მუხლით მიმდინარეობს.

სამართალდამცავები ყოფილი პარლამენტარის,მკვლელობაში ბრალდებულს 8 აგვისტოდან ეძებნენ, სწორედ ამ დღეს გარდაიცვალა ნოდარ მოდებაძე. შუახნის მამაკაცი თელავის რაიონში სოფელ აკურაში საკუთარ ვენახში სანადირო თოფიდან გასროლით მოკლეს.

სოფელ აკურას მცხოვრებთა ინფორმაციით, ნოდარ მოდებაძე მკვლელს, სავარაუდოდ, იცნობდა. ისინი ფიქრობენ, რომ შელაპარაკება ყოფით ნიადაგზე მოუვიდათ. ადგილობრივები ყვებიან, რომ ერთ-ერთ მწყემსს მოდებაძის ვენახში საქონელი აკრძალვის მიუხედავად შეჰყავდა და ვაზის ნარგავებს უფუჭებდა.

მოსახლეობის ინფორმაციით, ყოფილი პარლამენტარი ერთ-ერთმა ადგილობრივმა მწყემსმა შელაპარაკების ნიადაგზე მოკლა.