საია-ს საჩივარი მიხეილ სააკაშვილისა და „ნაცმოძრაობის“ დაჯარიმების შესახებ აჭარის უმაღლესმა საარჩევნო კომისიამ წარმოებაში არ მიიღო

სამართალი - 14:29, 09 Aug, 2016

2983

აჭარის უმაღლესმა საარჩევნო კომისიამ „საქართველოს ახალგაზრდა იურისტთა ასოციაციის“ საჩივარი, რომელიც საქართველოს მესამე პრეზიდენტის მიხეილ სააკაშვილისა და „ნაციონალური მოძრაობის“ საარჩევნო კოდექსის დარღვევისთვის დაჯარიმებას ითვალისწინებდა წარმოებაში არ მიიღო.

79-ე ოლქის გადაწყვეტილებით, მიხეილ სააკაშვილი არ არის საქართველოს მოქალაქე, საქართველოში არ იმყოფება და მის მიერ საარჩევნო კოდექსით აკრძალული ქმედების განხორციელება ვერ გახდება ადმინისტრაციული პასუხისმგებლობის დაკისრებისა და სამართალდარღვევის ოქმის შედგენის საფუძველი.

აჭარის უმაღლესმა საარჩევნო კომისიამ (უსკო) საია-ს საჩივრის არსებითად განხილვაზე უარი თქვა იმ მოტივით, რომ „უსკო უფლებამოსილი არ არის იმსჯელოს აღნიშნულ საკითხზე“.

საია-მ აჭარის უმაღლეს საარჩევნო კომისიას 1 აგვისტოს, მას შემდეგ მიმართა, რაც 31 ივლისს "ნაციონალური მოძრაობის" ბათუმის ოფისმა მაჟორიტარობის კანდიდატები წარადგინა, წარდგენაზე კი მხარდამჭერებს უცხო ქვეყნის მოქალაქემ, ოდესის გუბერნატორმა მიხეილ სააკაშილმა მიმართა.

საია მიიჩნევს, რომ საარჩევნო კოდექსის 45 მუხლის 4 პუნქტის "ვ" ქვეპუნქტით თანახმად, უცხო ქვეყნის მოქალაქეს ეკრძალება წინასაარჩევნო აგიტაციაში ჩართვა და მიხეილ სააკაშვილის ჩართვა, სწორედ ამ მუხლს არღვევდა.