პოლიცია ყოფილი პარლამენტარის მკვლელობაში ბრალდებულს 2 დღეა ეძებს

სამართალი - 11:34, 09 Aug, 2016

6683

სამართალდამცავები ყოფილი პარლამენტარის, 65 წლის ნოდარ მოდებაძის მკვლელობაში ბრალდებულს ამ დრომდე ეძებენ. თელავის რაიონში სოფელ აკურას მკვიდრი გუშინ საკუთარ ვენახში სანადირო თოფიდან გასროლით მოკლეს.

მკვლელობას ვენახის დარაჯი შეესწრო, რომელიც პოლიციაში გუშინ დაკითხეს. სოფელ აკურას მცხოვრებთა ინფორმაციით, ნოდარ მოდებაძე მკვლელს, სავარაუდოდ, იცნობდა. ისინი ფიქრობენ, რომ შელაპარაკება ყოფით ნიადაგზე მოუვიდათ. ადგილობრივები ყვებიან, რომ ერთ-ერთ მწყემსს მოდებაძის ვენახში საქონელი აკრძალვის მიუხედავად შეჰყავდა და ვაზის ნარგავებს უფუჭებდა.

მოსახლეობის ინფორმაციით, ყოფილი პარლამენტარი ერთ-ერთმა ადგილობრივმა მწყემსმა შელაპარაკების ნიადაგზე მოკლა.

როგორც "ნიუპოსტს" შინაგან საქმეთა სამინისტროში განუცხადეს, ნოდარ მოდებაძის მკვლელის ვინაობა უკვე დადგენილია და ამ დროისთვის მისი სამძებრო ღონისძიებები მიმდინარეობს.

ნოდარ მოდებაძე პარლამენტის წევრი 1999-2004 წლებში იყო. ის საარჩევნო ბლოკ "საქართველოს აღორძინებას" წარმოადგენდა. ნოდარ მოდებაძე აკურის ღვინის ქარხნის ერთ-ერთი მფლობელი იყო. მისთვის ქონების ჩამორთმევის საქმეზე მთავარმა პროკურატურამ შს ყოფილ მინისტრ ვანო მერაბიშვილს და ყოფილ გენერალურ პროკურორ ზურაბ ადეიშვილს 2015 წელს ბრალი წაუყენა.

ნოდარ მოდებაძე ახალგაზრდობაში თავისუფალი სტილით მოჭიდავე იყო, გამოდიოდა ყველაზე პრესტიჟულ, ზემძიმე წონით კატეგორიაში. 1973 წლის ევროპის ჩემპიონი. მსოფლიოს თასის მფლობელი (1974). სსრკ აბსოლუტური ჩემპიონი (1977) და ორგზის მეორე პრიზიორი (1973, 1977). სსრკ ხალხთა მე-6 სპარტაკიადის მეორე პრიზიორი (1975). თბილისის საერთაშორისო ტურნირის გამარჯვებული.