რამდენიმე დღის წინ სამართალდამცავებმა ქრთამის აღების ფაქტზე ორი პირი დააკავეს, საუბარია ნანა შენგელიასა და მაია ბეწვაიაზე.

გამოძიებამ დაადგინა, რომ ბრალდებულებმა წინასწარი შეთანხმებით მოატყუეს ერთ-ერთი დევნილი პირი, რომ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროში გავლენიანი ნაცნობები ჰყავდათ, რომელთა მეშვეობითაც შესაძლებელი იყო მისთვის საცხოვრებელი ფართის მიღება. ბინის სანაცვლოდ, ბრალდებულებმა დევნილ პირს მოსთხოვეს და თაღლითურად გამოართვეს 2000 აშშ დოლარი.

დღეს სასამართლომ ორივე მათგანს აღკვეთის ღონისძიების სახით ორთვიანი წინასწარი პატიმრობა შეუფარდა. ნანა შენგელიას შემთხვევაში ადვოკატი ბრალდებულის გათავისუფლებას ითხოვდა, თუმცა, სასამართლომ შუამდგომლობა არ დააკმაყოფილა.