უგულავა-კაბელების გაერთიანებული სარჩელის განხილვა 12:00 საათზე იყო დანიშნული, თუმცა ამ დროისთვის საკონსტიტუციო სასამართლოში მხოლოდ 2 მოსამართლე მივიდა. 9 მოსამართლიდან სხდომის განახლებისთვის მინიმუმ 6 მოსამართლის მონაწილეობა უნდა დაფიქსირდეს.

პირველი კოლეგიის წევრის კონსტანტინე ვარძელაშვილის განმარტებით, თუ მოსამართლეები არ შეიკრიბებიან, სხდომა არ ჩატარდება. მისივე თქმით, კოლეგებთან არ უსაუბრია და არ იცის, რამდენი მოსამართლე შეიკრიბება.

"მე მზად ვარ მონაწილეობა მივიღო პროცესში. დამატებითი კომენტარისგან თავს შევიკავებ. საკმარისზე მეტი განცხადებები გაკეთდა საჯაროდ და ვფიქრობ, რომ ჩვენ უნდა შევძლოთ და გავაგრძელოთ დისკუსიები სასამართლოს შენობის შიგნით. თუ მოსამართლეები არ შეიკრიბებიან პროცესი ვერ ჩატარდება. დიდი იმედი მაქვს, რომ ჩვენ შევძლებთ შეკრებას", - აღნიშნა კონსტანტინე ვარძელაშვილმა.

პირველი კოლეგიის წევრმა ქეთევან ერემაძემ მოკლე კომენტარი გააკეთა და განაცხადა, რომ "თუ იქნება ქვორუმი სხდომა გაიმართება".
საკონსტიტუციო სასამართლოს მინიმუმ სამი მოსამართლე თბილისში იმყოფება და ისინი 12:00 საათისთვის ბათუმში, საკონსტიტუციო სასამართლოს შენობაში მისვლას ვერ შეძლებენ.

არსებული ინფორმაციით, პლენუმის 9 მოსამართლიდან პროცესის განახლებას უფრო ნაკლები მომხრე ჰყავს, ვიდრე მოწინააღმდეგე.

კვორუმის შეკრების საკითხი კითხვის ნიშნის ქვეშ გუშინ, საკონსტიტუციო სასამართლოს მოსამართლეების ნაწილის განცხადების შემდეგ დადგა. მოსამართლე მერაბ ტურავამ განაცხადა, რომ შესაძლებელია, არ მივიდეს სხდომაზე, რადგან მოსამართლეები მიიჩნევენ, რომ რიგი გახმაურებული საქმეების, მათ შორის გიგი უგულავას და ე.წ. კაბელების საქმის გაერთიანებული სარჩელის განხილვის დაწყება, დაჩაქარებული წესით, რიგითობის დარღვევით მოხდა.

უგულავა-კაბელების საქმეზე არსებითი განხილვა 22 ივლისს დაიწყო. მოსარჩელეები სსკ 182-ე მუხლს ასაჩივრებენ, რომელიც გაფლანგვას გულისხმობს. ეს ორი საქმე გაფლანგვის მუხლით გაერთიანდა. პროცესისგანახლების შემთხვევაში დღეს მხარეები დასკვნითი სიტყვების წარმოთქმას აპირებენ რის შემდეგაც პლენუმი გადაწყვეტილების გამოსატანად სათათბიროდ გავა.