თბილისში ტერაქტის მუქარის შემცველი პოსტის გამო 23 წლის დუისელი ახალგაზრდა დააკავეს

სამართალი - 11:05, 30 Jul, 2016

26883

თბილისში აფეთქების მუქარის შემცველი ტექსტის სოციალურ ქსელში გავრცელების გამო, სოფელ დუისში მცხოვრები 23 წლის ახალგაზრდა დააკავეს. როგორც ,,ნიუპოსტსთან“ სახელმწიფო უსაფრთხოების სამსახურის პრესცენტრი აცხადებს, ამ ეტაპზე მიმდინარეობს საგამოძიებო მოქმედებები. უწყებაში სხვა დეტალებზე არ საუბრობენ.

სოციალურ ქსელში ფეისბუკმომხმარებელმა, რომელსაც პროფილის სურათად ISIS-ის ტერორისტის ომარ ალ შიშანის (თარხან ბათირაშვილი) ფოტო აქვს, აფეთქების ამსახველი ფოტო გამოაქვეყნა სტატუსთან ერთად, რომელიც თბილისში 12:30 საათზე „ფეირვერკის“ შესახებ იტყობინებოდა. აღნიშნული პოსტი ინტერნეტმომხმარებლებმა თბილისში შესაძლო აფეთქების მუქარად მიიჩნიეს.

აღნიშნულ ფაქტზე საქართველოს სახელმწიფო უსაფრთხოების სამსახურმა გამოძიება დაიწყო, საგამოძიებო მოქმედებებს სუს-ის კონტრტერორისტული დეპარტამენტი აწარმოებს.

„სახელმწიფო უსაფრთხოების სამსახური აღნიშნულ ფაქტზე ყველა საჭირო ინფორმაციას ფლობს. სუს-ის კონტრტერორისტულმა დეპარტამენტმა გამოძიება ინფორმაციის გავრცელებისთანავე დაუყოვნებლივ დაიწყო. საგამოძიებო მოქმედებების შესახებ მოგვიანებით გაცნობებთ”- აცხადებენ სუს-ში.