"როდესაც ადვოკატი მოითხოვა უთხრეს: თავი ევროპაში ხომ არ გგონიაო"- რას აცხადებს მინდია გოგოჭურის ადვოკატი

სამართალი - 20:21, 27 Jul, 2016

8719

საქართველოს პრეზიდენტის ოჯახის წევრმა მინდია გოგოჭურმა, რომელიც მასზე განხორციელებული ზეწოლის ფაქტთან დაკავშირებით პროკურატურაში გამოკითხვაზე იმყოფებოდა, საგამოძიებო უწყება უკომენტაროდ დატოვა. ჟურნალისტებთან კომენტარი მისმა ადვოკატმა სოსო ბარათაშვილმა გააკეთა. გოგოჭურის უფლებადამცველის თქმით ,გასულ თვეს მომხდარი შემთხვევის დროს სამართალდამცავებმა უფლებამოსილებას გადააჭარბეს და გოგოჭურის დაკავების დროს მას დაახლოებით 6 საათით შეუზღუდეს პოლიციელებმა გადაადგილების თავისუფლება, დაკავება განხორციელდა უხეში დარღვევებით, რაც იძლევა იმის საფუძველს, რომ მისი დაკავება გარკვეულ მიზანს ემსახურებოდა. ბარათაშვილის თქმით, პოლიციელებისთვის კარგად იყო ცნობილი მინდია გოგოჭურის ვინაობა და მისი კავშირი პრეზიდენტთან:

“მათ იცოდნენ პრეზიდენტთან მინდია გოგოჭურის ნათესაური კავშირი და ეს არც დაუმალავთ. ბუნებრივია, ასეთი უხეში დარღვევები რაღაც მიზნით უნდა ყოფილიყო განხორციელებული. პოლიციელებს ჰქონდათ საკმაოდ აგდებული დამოკიდებულება და ხდებოდა კანონის უგულვებელყოფა. როდესაც გოგოჭურმა მოითხოვა ადვოკატი, პოლიციელებმა უთხრეს: თავი ევროპაში ხომ არ გგონიაო და ა.შ.”- განაცხადა ბარათაშვილმა.

საქმეზე გამოძიება სამსახურეობრივი უფლებამოსილების გადამეტების მუხლით მიმდინარეობს.

შეგახსენებთ, რომ რამდენიმე დღის წინ, პრეზიდენტის მიერ გამართულ საგანგებო ბრიფინგზე ცნობილი გახდა, რომ ერთი თვის წინ მინდია გოგოჭურის სახლში ჩხრეკა ჩატარდა.