საკონსტიტუციო სასამართლოს მოსამართლეები პროკურატურაში დაიბარეს

სამართალი - 18:44, 26 Jul, 2016

2450

საკონსტიტუციო სასამართლოს მოსამართლის მერაბ ტურავას განცხადებით, პროკურატურაში გამოკითხვაზე საკონსტიტუციო სასამართლოს ყველა მოსამართლეა დაბარებული. საქმე ეხება სასამართლოს თავმჯდომარის გიორგი პაპუაშვილის მიერ გაკეთებულ განცხადებას, რომელიც მოსამართლეებზე განხორციელებულ ზეწოლას ეხებოდა.

აღნიშნულ განცხადებას ადასტურებს პროკურატურის საზოგადოებასთან ურთიერთობის დეპარტამენტის უფროსიც, როგორც ნათია სუხიაშვილმა "ნიუპოსტთან" განაცხადა გამოკითხვაზე ყველა მოსამართლეა დაბარებული, თუმცა უწყების წარმომადგენელი მოსამართლეების პროკურატურაში მისვლის თარიღს ჯერჯერობით არ აკონკრეტებს.

შეგახსენებთ, საკონსტიტუციო სასამართლოს მოსამართლეებზე განხორციელებულ ზეწოლასთან დაკავშირებით განცხადება სასამართლოს თავმჯდომარემ გიორგი პაპუაშვილმა გააკეთა. მისი თქმით ბოლო პერიოდის განმავლობაში მიმდინარეობს მიზანმიმართული ზეწოლა მოსამართლეებზე, რაც გამოიხატება მათზე თვალთვალში, მათ კომერციულ საქმეებზე ზეწოლაში, დაშანტაჟებაში რომ მათი ახლო ნათესავები დაკავებული იქნებიან სხვადასხვა საბაბით, აგრეთვე პირადი ხასიათის ინფორმაციის გასაჯაროებით.

აღნიშნულ საქმეზე მთავარი პროკურატურის საგამოძიებო ნაწილში დაიწყო გამოძიება საკონსტიტუციო სასამართლოში სამართალწარმოების განხორციელებაზე ზეგავლენის მიზნით სასამართლოს საქმიანობაში ამა თუ იმ ფორმით უხეში ჩარევის, ასევე პირადი ცხოვრების საიდუმლოს უკანონოდ მოპოვების და გამოყენების შესაძლო ფაქტებზე საქართველოს სისხლის სამართის კოდექსის 364-ე მუხლის II ნაწილითა და 1571 მუხლის I ნაწილით. გამოძიების დაწყების შესახებ განცხადება უწყებამ დღეს გაავრცელა.