ამ წუთებში აქცია მიმდინარეობს ლანჩხუთში. ჩოჩხათის თემის სოფელ მოედანში, სადაც ასეულობით ადგილობრივი კარიერის მშენებლობას აპროტესტებს.

ადგილზე მობილიზებულია პოლიციაც.

როგორც ადგილობრივები გვეუბნებიან, ისინი არ დაუშვებენ ადგილზე მსგავსი ტიპის სამუშაოებს და ნებისმიერი გზით დაიცავენ მათ უსაფრთხოებას: "ეს ტერიტორია ადრე ნაყიდი ჰქონდა ჩინურ კომპანიას, მაშინაც აქციები გავმართეთ, მოვითხოვეთ კომისია, რომ შეესწავლათ ეს ტერიტორია. მათი დასკვნის საფუძველზე, აქ არ შეიძლება მსგავსი ტიპის სამუშაოების ჩატარება. ეს ადგილი არის მეწყერსაშიში და აქედან ტონობით ინერტული მასალის გატანა ნიშნავს, რომ ჩვენ წავილეკებით. ახლა გავიგეთ, რომ ჩინური კომპანიისგან ეს ტერიტორია უყიდია ვიღაც ქალბატონს, გვარად ფოფხაძეს და როგორც გვითხრეს, ეს გედი ფოფხაძის ნათესავია. ის მოდისო დაცვის პოლიციის თანხლებით, მოჰყავთ ტექნიკა და უნდათ პირდაპირ დაიწყონ სამუშაოების წარმოება. ეს არის გამორიცხული"-აცხადებს მოსახლეობა.

"გურიის მოამბესთან" შექმნილი პრობლემის სიმწვავესა და მოსალოდნელ საფრთხეებზე საუბრობს სოფლის რწმუნებულიც: "ადრე აქ იყო მოსული ჩინური კომპანია, არ დაუშვა მოსახლეობამ, რომ გაეტანათ ინერტული მასალა, ახლა ვიღაც ქალი ყოფილა და ის აპირებს ძალით დაიწყოს სამუშაოები. მოდის დაცვით და ტექნიკით. ინფორმირებულია გამგებელი, უშიშოება, პოლცია. ყველამ ყველაფერი იცის. აქ არის პოლიცია. კომისიის დასკვა არის, რომ არ შეიძლება ამ ადგილიდან აღება მასალის. ეს ქალბატონი იყო აქ ადრე და არ დაანება მოსახლეობამ სამუშაოები. არ ვიცი აქ რა მოხდება. მდინარე სუფსის პირას არის ეს კარიერი, არის საყანე ფართობები. მოსახლეობა იძახის ისედაც ვინგრევითო და უარესი არ დაგვემართოს. მე ამათ გვერდით ვარ, გამგებელმაც მითხრა, ხალხის მოთხოვნა რაც არის გათვალისწინეთ და არ ჩაუშვათ ისინი სანაპიროზეო. კომისიამ გუბერნიას მიმართა, გუბერნიას უნდა შეესწავლა ეს საკითხი, იყო პრემიერის ბრძანებულება, ღარიბაშვილის დროინდელი, რომლის მიხედვითაც 20 კილომეტრან ზოლში საერთოდ აკრძალულია ინერტული მასალის აღება. აქ ზემოთ მიწის გამაგრებითი სამუშაოები მიმდინარეობს, რადგან მეწყერსაშიში ადგილია და ქვემოდან მიწას გვითხრიან"-გვითხრა გამგებლის წარმომადგენელმა, ჩოჩხათის თემში.

ამ წუთებში ადგილზე იმყოფება ჩვენი გადამღები ჯგუფი და დამატებით ინფორმაციას მიღებისთანავე მოგაწვდით.
წყარო:http://guriismoambe.com/