გორის მერიაში პრივატიზაციის და აუქციონების თემაზე მოსახლეობასთან შეხვედრა გაიმართა

რეგიონები - 18:47, 13 Jul, 2016

1570

ოთხშაბათის ტრადიციული შეხვედრა მოსახლეობასთან ,,ღია კარის დღის“ ფორმატში გორის მერიამ დღეს დემოკრატიული ჩართულობის ცენტრში გამართა - ამის შესახებ ინფორმაციას გორის მერიის საზოგადოებასთან ურთიერთობის სამსახური ავრცელებს.

შეხვედრის თემა იყო პრივატიზაცია და აუქციონები. დაინტერესებული მოქალაქეების კითხვებს გორის მერის მოადგილე გიორგი რაზმაძე, ეკონომიკური განვითარების სამსახურის უფროსი აკაკი ხუფენია და ქონების მართვის განყოფილების უფროსი ეკატერინე კაპანაძე პასუხობდნენ.

შეხვედრაზე მოქალაქეების მხრიდან დაისვა კითხვები უნებართვო ფართების დაკანონების, მიწების იჯარით აღების პროცედურებისა და ფართების რეგისტრაციის საკითხებზე.

,,პრივატიზება, აუქციონი და იჯარები სპეციფიური თემაა, რაზეც ჩვენს მოსახლეობას ძალიან მწირი ინფორმაცია აქვს. ამიტომ გადავწყვიტეთ ღია კარის დღის ერთი ოთხშაბათი ამ თემით დაინტერესებული მოქალაქეებისთვის დაგვეთმო, მიგვეწოდებინა საჭირო ინფორმაცია, გაგვეცა რეკომენდაციები და სამართლებრივი კონსულტაცია. ამ საკითხებზე მოსახლეობასთან შეხვედრები მომავალშიც გაგრძელდება, რათა მაქსიმალურად მეტი ინფორმაცია მივაწოდოთ ჩვენს თითოეულ მოქალაქეს“ - განაცხადა გორის მერის მოადგილემ გიორგი რაზმაძემ.

ღია კარის დღეები ტრადიციულად ყოველი კვირის ოთხშაბათს იმართება. აღნიშნული ფორმატის შეხვედრები მიმდინარე წლის აპრილის თვიდან დაიწყო, სადაც ქალაქის მერიის უმაღლესი თანამდებობის პირები მოსახლეობას როგორც დახურულ, ასევე ღია სივრცეებში ხვდებიან და მათთვის საინტერესო კითხვებს პასუხობენ.