მეუღლისა და შვილის მკვლელობაში ბრალდებული მაგდა პაპიძის სასამართლო პროცესზე მომხდარი ჩხუბის შემდეგ სამართალდამცავებმა დაპირისპირებაში მონაწილე პირები პოლიციაში დასაკითხად გადაიყვანეს. მათ შორის არიან მოკლული ომარ ქაფიაშვილის დედა დარეჯან მინდიკაური და ბრალდებული მაგდა პაპიძის დედა ლია შამუგია. მომხდარზე გამოძიება ცემის მუხლითაა დაწყებული.

მომხდარ ფაქტთან დაკავშირებით მხარეები საპირიპირო ვერსიებს ავრცელებენ. ქაფიაშვილების განცხადებით მაგდა პაპიძის დედა და და საპირფარეშოში სპეციალურად შევიდნენ იმ დროს როდესაც იქ დარეჯან მინდიკაური იმყოფებოდა და მას მაგდა პაპიძის დედამ ხელი დაარტყა.

ლია შამუგიასა და ლანა პაპიძის მტკიცებით კი ფიზიკური დაპირისპირება ქაფიაშვილის ოჯახის წევრების მიერ იყო ინსპირირებული.