საკონსტიტუციო სასამართლოში "რუსთავი 2"-ის სარჩელის განხილვა გრძელდება

სამართალი - 18:20, 17 Jun, 2016

2265

საკონსტიტუციო სასამართლოში დღეს რუსთავი 2-ის სარჩელის განხილვა გაგრძელდება. რუსთავი 2 საკონსტიტუციო სარჩელით სამოქალაქო კოდექსის 54-ე და 55-ე მუხლებს ასაჩივრებს, რომელიც ამორალური გარიგების შემთხვევაში, შეთანხმებას აუქმებს. სწორედ ამ ნორმის საფუძველზე დაობს ქიბარ ხალვაში რუსთავი 2-ის ამჟამინდელ მფლობელებთან.

პლენუმის წევრებმა უკვე მოისმინეს, როგორც რუსთავი 2 - ის ასევე პარლამენტის წარმომადგენლების დასკვნითი სიტყვები ე.წ ამორალური გარიგებასთან დაკავშირებით.

სასამართლოზე პარლამენტის წარმომადგენელმა დააყენა შუამდგომლობა, რომ სასამართლოზე მოწვეული ყოფილიყო სპეციალისტი, რომელიც საკუთარ პოზიციას დააფიქსირებდა, თუმცა ეს რუსთავი 2 - ის ადვოკატებმა გააპროტესტეს.

მათი არგუმენტი იყო ის რომ , აღნიშნულ პირს შესაძლოა დაინტერესება ჰქონეს ამ საქმეში, რადგან რუსთავი 2 თან დაკავშირებით ის საკუთარ აზრს ღიად აფიქსირებდა.

"საკოსნტიტუციო სამართალწარმოებათა შესახებ კანონი იძლევა საშუალებას აცილებულ იყოს ექსპერტი, თუ კი შეიძლება არსებობდეს გარკვეული გარემოებები რომელიც ეჭვის საფუძველი არის პირის მიუკერძოებლობასთან დაკავშირებით. ამ შემთხვევაში პარლამენტის მიერ მოთხოვნილი ექსპერტი საკუთარ პოზიციებს არაერთხელ აჟღერებდა სწორედ რუსთავი 2 თან დაკავშირებით. მას შეფასებები გაკეთებული აქვს რუსთავი 2 - ის ყველა გადაწყვეტილებაზე და ყველა გადაწყვეტილებას ის დადებითად აფასებს და უარყოფითად აფასებს ჩვენი მხარის მიერ წარდგენილ პოზიციებს. აქიდან გამომდინარე მიგვაჩნია რომ ის მიუკერძოებელი ვერ იქნებოდა"- აღნიშნა დიმიტრი საძაგლიშვილმა.

განსხვავებულია საქართველოს პარლამენტის წარმომადგენელის მოსაზრება.

"რაც უფრო მეტი პრაქტიკოსი იურისტისგან მოისმენს ინფორმაციას მუხლებთან დაკავშირებით მით უფრო გაუადვილდება სასამართლოს გადაწყვეტილების მიღება"- აღნიშნა თამარ მესხიამ.

მისი თქმით, ექსპერტი თავის პოზიციებს წერილობით მიაწვდის სასამართლოს.