"რუსთავი 2"-ის საქმე- მერაბ ტურავამ სასამართლოზე სპეციალური განცხადება გააკეთა

სამართალი - 13:13, 17 Jun, 2016

6006

საკონსტიტუციო სასამართლოს მოსამართლის მერაბ ტურავას განცხადებით სიმართლეს არ შეესაბამება „რუსთავი2’-ის იურისტების განცხადება იმასთან დაკავშირებით, რომ მან რ2-ის საქმის პლენუმისთვის გადაცემა დროის გაჭიანურების გამო მოითხოვა. ტურავამ განცხადება სასამართლო სხდომის მიმდინარეობისას გააკეთა:

"მაშინ, როცა საქმის პლენუმისთვის გადაცემის საკითხი დავაყენე, პირველ კოლეგიას გადაწყვეტილების თავდაპირველი ვერსიაც კი არ ქონდა შემუშავებული და არ ვიცოდი რა გადაწყვეტილებას მივიღებდით. შესაბამისად, ვერანაირად ვერ დავასწრებდით სააპელაციო სასამართლოს გადაწყვეტილებას. მინდა გთხოვოთ, რომ არ ჩათვალოთ ჩემი შუამდგომლობის დაყენება საქმის გაჭიანურებად და არ ჩათვალოთ, რომ მიზნად ისახავდა სააპელაციო სასამართლოს გადაწყვეტილებამდე არ გამოცხადებულიყო საკონსტიტუციო სასამართლოს გადაწყვეტილება. არც ერთ შემთხვევაში არ იგეგმებოდა სააპელაციო სასამართლოს გადაწყვეტილებამდე საკონსტიტუციო სასამართლოს გადაწყვეტილების 679 სარჩელზე გამოცხადება. ალბათ თქვენ არ გქონდათ სათანადო ინფორმაცია, ან გქონდათ და შეგნებულად ამახინჯებთ მას“ - განაცხადა ტურავამ.

ამგვარი ინიციატივის გამო ტურავამ თავმჯდომარის შენიშვნა დაიმსახურა.

“თავი შევიკავეთ ინდივიდუალური ასეთი ჩართვებისგან, თუ სასამართლო საჭიროდ ჩათვლის თვითონ გააკეთებს განცხადებას. ასევე, ვთხოვ კოლეგებს - კონფიდენციალური ინფორმაცია მეორედ არ ახსენონ, აღარ ვისაუბრობთ ამ თემაზე“ - აღნიშნა საკონსტიტუციო სასამართლოს თავმჯდომარემ, გიორგი პაპუაშვილმა.

შეგახსენებთ, მერაბ ტურავამ საკონსტიტუციო სასამართლოს პლენუმს რუსთავი2-ის სარჩელსი განხილვის მოთხოვნით რამდენიმე დღის წინ მიმართა. მოსამართლეს ამის საშუალება საკონსტიტუციო სასამართლოსთან დაკავშირებით მიღებულმა ახალმა კანონმა მისცა. რუსთავი2-ის ადვოკეტების მტკიცებით კი ხელისუფლების მიერ ამ კანონის მიღებაც და შემდგომ ამ კანონის დებულებების მიხედვით მოსამართლე ტურავას მოქმედებაც, რუსთავი ორის წინააღმდეგ მიმართული ქმედებებია.
ტელეკომპანიის სარჩელი, რომლის განხილვისთვისაც ტურავამ პლენუმს მიმართა სამოქალაქო კოდექსის უსაფუძვლოდ გამდიდრებისა და ხანდაზმულობის ვადების მუხლებს და მის კონსტიტუციურობასთან შესაბამისობას შეეხება.