,,რა იმედით მიდიოდი და რა იმედით მოდიხარ? - სუსტი დიპლომატია და მოუმზადებელი ვიზიტი ბერლინში

პოზიცია - 21:07, 15 Jun, 2016

5741

ოფიციალური ინფორმაციით, საქართველოს პრემიერ-მინისტრ გიორგი კვირიკაშვილის და გერმანიის ფედერალური კანცლერის, ანგელა მერკელის შეხვედრის მთავარი თემები საქართველო–გერმანიის ორმხრივი ურთიერთობები, საქართველოს ევროკავშირთან ინტეგრაციის დღის წესრიგი და რეგიონში არსებული ვითარება იყო.

ბერლინში გერმანიის კანცლერთან, შეხვედრის შემდეგ გამართულ პრესკონფერენციაზე კი კვირიკაშვილმა რწმენა გამოთქვა, რომ საქართველო და გერმანია მიაღწევენ ურთიერთგაგებას ვიზების ლიბერალიზაციისა და ნატოში საქართველოს გაწევრიანების საკითხებში.

აღნიშნული განცხადება კვირიკაშვილმა მას შემდეგ, გააკეთა რაც საქართველოს პრემიერ-მინისტრს გერმანიის მედიის წარმომადგენელმა ჰკითხა, ხომ არ არის იმედგაცრუებული გერმანიის სკეპტიკური დამოკიდებულებით საქართველოსათვის სავიზო რეჟიმის ლიბერალიზაციისა და ნატოში გაწევრიანების მიმართ.

„ჩვენ არ ვთვლით, რომ გერმანიამ გაგვიცრუა იმედები. ჩვენ ვთვლით, რომ ის პროცესი, რომელშიც ახლა ვიმყოფებით, კიდევ უფრო გვაახლოვებს გერმანიას. გერმანიის როლი საქართველოს ევროინტეგრაციის პროცესში და საქართველოს ევროპული ტრანსფორმაციის პროცესში კიდევ უფრო გამოიკვეთა“, - განაცხადა კვირიკაშვილმა.

თავის მხრივ, მერკელმა აღნიშნა, რომ საქართველოსთვის სავიზო რეჟიმის ლიბერალიზაციის საკითხზე ამჟამად მიმდინარეობს კონსულტაციები ევროპარლამენტში და გერმანია მხარს დაუჭერს კონსულტაციების შეძლებისდაგვარად მალე დასრულებას.

არის თუ არა დაგვიანებული ხელისუფლების გააქტიურება, იმ ფონზე, როცა საქართველოსთვის უვიზო რეჟიმის მინიჭებაზე კენჭიყრა ევროპარლამენტში სექტემბერში დაინიშნა და ბრუნდება თუ არა პრემიერი ხელცარიელი გერმანიიდან, რითი აიხსნება ევროკავშირის წამყვანი ქვეყნების (გერმანია, საფრანგეთი, იტალია) გადაწყვეტილება საქართველოსთვის ვიზალიბერალიზაციის დროში გაჭიანურებასთან დაკავშირებით? - ამის გარკვევას "ნიუპოსტი" ექსპერტ თორნიკე შარაშენიძესთან შეეცადა.

ჯიპა-ს პროფესორი და ექსპერტი თორნიკე შარაშენიძე ჩვენთან საუბრისას აცხადებს, რომ კვირიკაშვილი ქვეყანაში არსებული დემოკრატიის ხარისხით ვერ დაიტრაბახებდა.

„საინტერესოა რითი უნდა ჩასულიყო კვირიკაშვილი მერკელთან, რა უნდა შეეთავაზებინა. საქართველო დემოკრატიის შუქურააო რომ ეთქვა, არ გამოუვიდა, რადგან რაც ბოლო დროს ჩვენთან ხდება - ეს პოლიტიკური ვახანალია, პლუს ამას სტრასბურგის სასამართლოს საკმაოდ ცუდი გადაწყვეტილებით ვერ იტრაბახებდა. რითი უნდა გახადო საქართველო გერმანიისთვის საინტერესო? გერმანიისთვის საქართველო, როგორც სავაჭრო პარტნიორი არასერიოზულია. როცა არაფერი უჭირავს რა უნდა ქნას - უნდა მომზადდეს ვიზიტი და მოხდეს ლობირება, თუმცა საინტერესოა ვინ უნდა მოახდინოს ეს ლობირება. გერმანიაში ჩვენი საელჩო ამას ნამდვილად ვერ ახერხებს, დაწყებული ელჩით, რომელიც არაპროფესიონალია, საერთოდ არ არის დიპლომატი, ფაქტია, რომ იმ სერიოზულ ამოცანებს, რაც არის ის ვერ უმკლავდება”- აცხადებს შარაშენიძე

ექსპერტი ვარაუდობს, რომ საქართველოს მთავრობის მიერ გერმანიასთან ინტენსიური მუშაობა არ მიმდინარეობდა.

"როგორც ჩანს სანამ კვირიკაშვილი ჩავიდოდა გერმანიაში ვიზიტი არ მომზადდა, ანუ რა მოლოდინი უნდა ყოფილიყო მერკელისგან, რას ელოდა? გვითხრა მერკელმა რომ დაიცადეთ, იმუშავეთ და ასე შემდეგ... მოკლედ სამუშაო იყო"- აღნიშნა თორნიკე შარაშენიძემ "ნიუპოსტთან".

შარაშენიძე მიიჩნევს, რომ ხელისუფლებას გერმანიასთან და საფრანგეთთან განსაკუთრებული დიპლომატიური სამუშაოები უნდა ეწარმოებინა.

"მივიღეთ ის, რაც მოსალოდნელი იყო. მაგ ქვეყნებისთვის საქართველო ისეთ ინტერესის საგანი არ არის, მთავრობამ კი ყველაფერი უნდა გააკეთოს, რომ საქართველოთი დააინტერესოს და ეს აქტიური, სერიოზული ლობირებით უნდა მოხდეს, როგორც მთავრობაში ასევე იქაურ არასამთავრობო წრეებში. ეს არ ხდება, არანაირი პოლიტიკა ამ მიმართულებით არ არსებობს. ვინ აკეთებს ამ პოლიტიკას - საელჩო, თუმცა ეს საკმარისი არ არის, რადგან ჩვენი საელჩო ძალიან სუსტია. როცა გერმანიისთვის საქართველოში საინტერესო არაფერი არ აქვს, როცა ლობირებას ვერ ან არ ეწევი, საინტერესოა რა იმედით მიდიოდი და რა იმედით მოდიხარ?" - განმარტა ექსპერტმა.

დავით ჯაბაშვილი