ბათუმის პორტში 213 კგ ჰეროინი აღმოაჩინეს - საერთაშორისო ნარკოტრანზიტის ფაქტი საქართველოში

სამართალი - 14:25, 13 Jun, 2016

6061

შემოსავლების სამსახურის მებაჟე ოფიცრებმა 213 კილოგრამი ჰეროინი აღმოაჩინეს. სატვირთო ავტომობილში ნარკოტიკი სპეციალურ სამალავში 356 ბრიკეტად იყო დაფასოებული.

ტვირთი მოძრაობდა ირანიდან და აზეrბაიჯანის, საქართველოს და უკრაინის გავლით, ჰოლანდიისკენ მიემართებოდა.

საქმის მასალები შემოსავლების სამსახურმა გამოძიებისთვის შინაგან საქმეთა სამინისტროს გადასცა.

აღნიშნულთან დაკავშირებით ინფორმაციას შინაგან საქმეთა სამინისტროც ავრცელებს:

"შსს-ს ცენტრალური კრიმინალური პოლიციის დეპარტამენტის ნარკოტრანზიტის წინააღმდეგ ბრძოლის განყოფილებისა და ფინანსთა სამინისტროს სსიპ შემოსავლების სამსახურის საბაჟო დეპარტამენტის თანამშრომლებმა, ნარკოტიკული საშუალებების უკანონო ბრუნვის პრევენციის, გამოვლენის და აღკვეთის ხელშეწყობის ერთობლივი სამუშაო ჯგუფის ფარგლებში, ერთობლივი ღონისძიება ჩაატარეს.

ოპერატიული ღონისძიების შედეგად, 2016 წლის 12 ივნისს, ბათუმის პორტში, სატვირთო ავტომანქანის მისაბმელის იატაკში მოწყობილ სპეცილურ სამალავში აღმოჩენილი იქნა განსაკუთრებით დიდი ოდენობა - 356 შეკვრა ნარკოტიკული საშუალება, რაც, წინასწარი მონაცემებით, ჰეროინს შეიცავს. დადგინდა, რომ თითოეული შეკვრის წონა, დაახლოებით, 600 გრამს შეადგენს. სულ ამოღებულია 213 კილოგრამი ნარკოტიკული საშუალება.

შსს-ს ცენტრალური კრიმინალური პოლიციის დეპარტამენტის ნარკოტრანზიტის წინააღმდეგ ბრძოლის განყოფილება გამოძიებას ნარკოტიკული საშუალების ტრანზიტით საერთაშორისო გადაზიდვის ფაქტზე, საქართველოს სსკ-ს 262-ე მუხლის 1-ლი ნაწილით აწარმოებს."- აღნიშნულია უწყების ინფორმაციაში.