კორცხელის ინციდენტში მონაწილე სპორტსმენები დაკავებული არ არიან

სამართალი - 12:56, 02 Jun, 2016

1474

კორცხელის ინციდენტში მონაწილე სპორტსმენები დაკავებულები არ არიან. ამის შესახებ ბრალდებულების - კობა ტყეშელაშვილისა და ვლადიმერ გეგეშიძის ადვოკატმა ზურაბ ბელთაძემ განაცხადა.

დაცვის მხარისთვის უცნობია, როდის შევა სასამართლოში შუამდგომლობა ბრალდებულთათვის აღკვეთის ღონისძიების შეფარდების თაობაზე.

კორცხელის ინციდენტში მონაწილე პირების ნაწილს ხულიგნობის მუხლით ბრალი წარედგინათ.

სამართალდამცავმა უწყებამ ბრალდებულების ინიციალები გაავრცელა, შესაბამისად, სავარაუდოდ, გიორგი გიგაურს, კობა ტყეშელაშვილს, ნოშრევან წურწუმიას, გრიგოლ ტყემალაძესა და გიორგი გ-ს ბრალი 239-ე მუხლის მეორე ნაწილით წარედგინათ, რაც ხულიგნობას გულისხმობს წინასწარი შეთანხმებით ჯგუფის მიერ და ისჯება ჯარიმით ან საზოგადოებისათვის სასარგებლო შრომით ვადით 180-დან 200 საათამდე ან გამასწორებელი სამუშაოთი ვადით ერთიდან ორ წლამდე ან თავისუფლების აღკვეთით ვადით 2-დან 5 წლამდე.

ხოლო ვლადიმერ გეგეშიძეს ბრალი წარედგინა ამავე მუხლის მეორე და მესამე ნაწილებით, რაც გულისხმობს ხულიგნობას, ძალადობრივ ქმედებას ჩადენილს წინასწარი შეთანხმებით ჯგუფის მიერ ცეცხლსასროლი იარაღის ან იარაღად სხვა საგნის გამოყენებით. აღნიშნული დანაშაული ისჯება თავისუფლების აღკვეთით ვადით 4-დან 7 წლამდე.