ტრეფიკინგი თუ დაკავება ე.წ საზღვრის გადაკვეთის ბრალდებით

ტრეფიკინგი თუ დაკავება ე.წ საზღვრის გადაკვეთის ბრალდებით - ქორდში ახალგაზრდა მამაკაცს ეძებენ

სამართალი - 12:05, 02 Jun, 2016

2150

გორის მუნიციპალიტეტის სოფელ ქორდში მცხოვრებ 25 წლის ნიკა საღირაშვილს ოჯახი მეხუთე დღეა ეძებს.

ახალგაზრდა მამაკაცი ბოლოს სწორედ 5 დღის წინ ნახეს ამის შემდეგ მისი კვალი იკარგება.

ქორდის გორის მუნიციპალიტეტის გამგებლის წარმომადგენელი ქორდის თემში მურმან ბადაშვილი არ გამორიცხავს, რომ დაკარგული ოკუპირებულ ტერიტორიაზე ჰყავდეთ გადაყვანილი.

,,არ ვიცი რა შეიძლებოდა მომხდარიყო. ინფორმირებულები არიან სამართალდამცველები. შესაძლოა ე.წ საზღვრის გადაკვეთის ბრალდებით დააკავეს რუსმა სამხედროებმა და ცხინვალის იზოლატორში გადაიყვანეს, თუმცა ამ დრომდე ოჯახს არ დაკავშირებიან ცხინვალიდან"- აღნიშნავს გამგებლის წარმომადგენელი.

სოფელი ქორდი ოკუპირებულ ტერიტორიასთან მდებარეობს.

ბოლო ინფორმაციით, ამ წუთებში შიდა ქართლის სამხარეო პოლიციის დეპარტამენტთან ნიკოლოზ საღირაშვილის ოჯახის წევრები არიან შეკრებილები და სამართალდამცავებისგან ახალგაზრდას ადგილსამყოფელის დადგენას მოითხოვენ.

გაუჩინარებულის დედა და ნათესავები არ გამორიცხავენ, რომ ნიკა საღირაშვილი ოკუპირებული ტერიტორიის მოსაზღვრედ მდებარე სოფელ ქორდის განაპირას ე.წ. მესაზღვრეებმა დააკავეს.
ოჯახი კიდევ ერთ ვერსიას განიხილავს, რომლის მიხედვითაც ოკუპირებულ ტერიტორიაზე მდებარე სოფელ არცევში, რუს სამხედრო მოსამსახურეს, მესაქონლეობის ფერმა აქვს და იმ დაკავებულებს, რომლებიც არ გადაყავთ ცხინვალის მილიციის იზოლატორში, სავარაუდოდ ფერმაში ამუშავებენ.
დაკარგულის ოჯახის წევრები და ხელისუფლებისგან და სამართალდამცავი უწყებებისგან ორივე ვერსიოის უსწრაფესად გადამოწმებას მოითხოვენ. საღირაშვილების ოჯახის წევრებმა, დახმარებისთვის 112-ს, სამართალდამცავებს და წითელი ჯვრის გორის ოფისს უკვე მიმართეს.
ფაქტის შესახებ ინფორმირებულია ევროკავშირის სადამკვირვებლო მისიის გორის ოფისიც.