სააპელაციო სასამართლოში დღეს შესაძლოა რუსთავი 2-ის საქმეზე გადაწყვეტილება გამოცხადდეს. სხდომა დღეისთვის 10:30 არის ჩანიშნული.

გუშინდელ სხდომაზე რუსთავი2-ის იურისტების არც ერთი შუამდგომლობა არ დაკმაყოფილდა, მათ შორის კოლეგიის აცილებისა და საქმეში მტკიცებულებების და მესამე პირების ჩართვის შესახებ.

ნიკა გვარამიამ პროცესზე წინა კოლეგიის შემადგენლობაზე მიმდინარე ზეწოლის კონკრეტული ფაქტებიც დაასახელა და სასამართლოში მოწმეების დაბარებაც მოითხოვა, თუმცა ეს გარემოებაც უარყოფილი იქნა.

რუსთავი 2-ის იურისტები ამბობენ, რომ სასამართლო პროცესები ფორსირებულ რეჟიმში მიმდინარეობს, რასაც ქიბარ ხალვაშის ადვოკატი არ იზიარებს. თუმცა, პაატა სალია აცხადებს, რომ 5 თვიანი ვადა, რომელშიც სააპელაციო სასამართლომ საქმე უნდა განიხილოს, 8 ივნისს იწურება.