გენერალური შტაბის უფროსმა, გენერალ-მაიორმა ვახტანგ კაპანაძემ ჟურნალისტებთან საუბრისას ე.წ. კაბელების საქმეზე კომენტარი გააკეთა. კაპანაძის განცხადებით, მას აქვს მოლოდინი, რომ საქმეზე ბრალდებულები უდანაშაულოები არიან:

“ჯერ კიდევ მიმდინარეობს პროცესი. არ მინდა ჩემი საუბრით მათი ვითარება კიდევ უფრო დავამძიმო ან გავართულო, თუმცა ჩემი პიროვნული რწმენაა, იმედია, რომ ეს ბიჭები მართლები იქნებიან“, - განუცხადა ჟურნალისტებს ვახტანგ კაპანაძემ.

შეგახსენებთ, რომ თბილისის საქალაქო სასამართლომ ე.წ. კაბელების საქმეზე თავდაცვის სამინისტროს 5 ყოფილ თანამშრომელს გამამტყუნებელი განაჩენი გამოუტანა. მათ სასჯელის სახით 7 წლით თავისუფლების აღკვეთა შეეფარდათ. ბრალდებულებს 4 მილიონი ლარის გაფლანგვაში ედავებიან.