"ტელეფონი წამართვეს და ფოტოები წამიშალეს" - პოლიცია ჟურნალისტებს კორცხელის ინციდენტზე კითხავს

სამართალი - 18:29, 23 May, 2016

3646

სამართალდამცავები იმ ჟურნალისტებს კითხავენ, რომლებიც გუშინ კორცხელში მომხდარ დაპირისპირებას აშუქებდნენ. ჟურნალისტების განცხადებით, "ქართული ოცნების" მხარდამჭერები მედიის წარმომადგენელთა მიმართ განსაკუთრებული აგრესიით გამოირჩეოდნენ.

დაკითხვაზე იმყოფება "რუსთავი 2"- ის კორესპოდენტი ემა გოგოხიაც.

"კამერის გამოჩენისთანავე ისინი მიმალვას და სახის დაფარვას შეეცადნენ. მიუხედავად ამისა ჩვენ მაინც მოვახერხეთ მათი გადაღება. ისინი მოგვიანებით საარჩევნო უბანზე მოვიდნენ და მათი გამოჩენისთანავე სიტუაციის დაძაბვა დაიწყო. აგრესიის გამომწვევი მიზეზი იყო მედიის შეკითხვები, თუ რატომ იყვნენ ჩამოსულები, ვის დავალებას ასრულებდნენ, როგორ მოხვდნენ საარჩევნო უბანზე... მათი მხრიდან აგრესიული ქმედებები ხორციელდებოდა ოპერატორების მიმართაც, მათ ქვები ესროლეს"- აღნიშნა ჟურნალისტმა ემა გოგოხიამ.

ჟურნალისტ ირმა მესხიას თქმით, კი სამართალდამცავებმა მისი კუთვნილი ტელეფონი უნდა დაათვალიერონ, რადგან მას რესტორანში გადაღებული ფოტოები წაუშალეს.

"რესტორანში გადავიღე რამდენიმე კადრი, რის შემდეგაც ისინი მოვიდნენ ჩემთან, წამართვეს ტელეფონი და წამიშალეს კადრები. მითხრეს როგორ გავბედე მათი გადაღება, მითხრეს რომ ისინი არიან ის პირები ვინც ნაციონალური მოძრაობის წევრები აფორთხიალეს. რომ ვკითხე სად მიჰქონდათ ტელეფონი მითხრეს, რომ შს სამინისტროში. რომ ვიკითხე ისინი შს სამინისტროს წარმომადგენლები იყვნენ თუ არა? მითხრეს, რომ ეს ჩემი საქმე არ იყო"- თქვა ჟურნალისტმა.