საქართველოს მთავარი პროკურორი ირაკლი შოთაძე ე.წ კაბელების საქმეს კიდევ ერთხელ ეხმაურება. შოთაძე საქმეზე დაკავებული პირების ადვოკატებისა და „თავისუფალი დემოკრატების“ განცხადებებზე აკეთებს კომენტარს და აღნიშნავს, რომ მსგავსი განცხადებები საქმის პოლიტიზირებისკენ არის მიმართული. მისი განცხადებით, დაცვის მხარემ სასამართლოში მტკიცებულებების წარდგენა ვერ შეძლო, რომლებიც დაამტკიცებდნენ ბრალდებულთა უდანაშაულობას:

„დაცვის მხარე არანაირ მტკიცებულებებზე არ საუბრობს, იმიტომ, რომ მათ მტკიცებულებები უბრალოდ არ აქვთ. სასამართლოში მათ ვერ წარადგინეს ვერანაირი მტკიცებულებები. წაიყვანეს მხოლოდ 10 მოწმე, რომლებიც იყვნენ მსჯავრდებულების მეგობრები და მათ შორის დაკითხეს ჩვენი პროკურორი, ჯარჯი წიკლაური, რომელსაც რატომღაც უნდა მიეცა დაცვის სასარგებლოდ ჩვენება. შესაბამისად არანაირ მტკიცებულებებზე არ არის საუბარი. მიდის მხოლოდ პოლიტიკური სპეკულაციები. მოტივიც არსებობს, მიზანიც არსებობს, განზრახვაც არსებობს. დადგენილია, რომ თავდაცვის სამინისტროს თანამშრომლებს ჰქონდათ პირადი ურთიერთობა გამარჯვებულ კომპანიებთან. არსებობს მათი კავშირის დამადასტურებელი ინფორმაცია, მათ შორის სატელეფონო, მათ შორის პირადი შეხვედრები, ელექტრონული ფოსტის საშუალებით. მათი მოტივი იყო, რომ დახმარებოდნენ კონკრეტულ კომპანიას, რომ მათ მიეღოთ სარგებელი,“-განაცხადა ირაკლი შოთაძემ.