საქართველოს მთავარი პროკურორი დიპლომატიური კორპუსის წარმომადგენლებს ხვდება. ირაკლი შოთაძე მათ ე.წ. კაბელების საქმეზე სასამართლოს მიერ გამოტანილ განაჩენს, ბრალდებულთათვის 7 წლიანი პატიმრობის შეფარდების თემას დიპლომატებს დეტალურად წარუდგენს. აღსანიშნავია, რომ შეხვედრის დაწყებამდე მთავარმა პროკურატურამ ინფორმაცია გაავრცელა, სადაც მოყვანილია ამ საქმის მტკიცებულბების ნაწილი.

დიპლომატიური კორპუსისთვის დეტალური ინფორმაციის მიწოდებამდე, ირაკლი შოთაძემ შესავალ სიტყვაში აღნიშნა, რომ მიმდინარეობს საქმის განზრახ პოლიტიზირება:

„როგორც თქვენთვის უკვე ცნობილია, ე.წ. კაბელების საქმეზე რამდენიმე დღის წინ პირველი ინსტანციის სასამართლოს მიერ, მიღებული იქნა გადაწყვეტილება, რომლითაც სასამართლოს მიერ დამნაშავედ იქნა ცნობილი 5 პიროვნება, ჩვენს მიერ ბრალდებულად ცნობილი 5 პიროვნება ამ სისხლის სამართლის საქმეზე, იმ დანაშაულის ჩადენისათვის, რომელიც გათვალისწინებულია საქართველოს სისხლის სამართლის კოდექსის 182-ე მუხლით და სასჯელის სახით განესაზღვრათ 7 წლით თავისუფლების აღკვეთა.

აღნიშნული ფაქტის შემდეგ, ისე, რომ სასამართლოს განაჩენის სარეზოლუციო ნაწილი და ჯერ არ გამოქვეყნებულა სამოტივაციო ნაწილი, ანუ ის ნაწილი, სადაც მოსამართლე მსჯელობს იმ დასაბუთებაზე და მტკიცებულებებზე, რის საფუძველზეც მოხდა ჩვენი ბრალდებულების გამტყუნება, დამნაშავედ ცნობა, საჯარო ეთერის საშუალებებით, რიგი პოლიტიკური ძალების, არასამთავრობო სექტორის წარმომადგენლების და სხვათა მხრიდან, ეს გადაწყვეტილება უკვე მონათლულია უკანონო და დაუსაბუთებელ გადაწყვეტილებად.

მე მაქვს კითხვა, რითი ხელმძღვანელობენ ეს ადამიანები, როდესაც საუბრობენ გამამტყუნებელი განაჩენის დაუსაბუთებლობაზე და უკანონობაზე, როდესაც ეს განაჩენი თვალით არავის არ უნახავას?

ცალსახაა, რომ ამ ხალხს ამოძრავებს პირადი მოტივაცია, რათა ამ საქმეს მისცენ პოლიტიკური ელფერი, სრულიად უსაფუძვლოდ მოახდინონ მართლმსაჯულების პროცესის და პროკურატურის დისკრედიტაცია“, - განაცხადა ირაკლი შოთაძემ.