ჰომოფობიასთან ბრძოლის დღეს ლგბტ აქტივისტები საპატრიარქოსა და სხვა შენობების შეღებვისთვის დააკავეს

სამართალი - 11:11, 17 May, 2016

6354

ჰომოფობიასთან ბრძოლის საერთაშორისო დღეს თბილისში ლგბტ აქტივისტები დააკავეს.
10 პირი გამთენიისას ადმინისტრაციული შენობების იერსახის დამახინჯების ბრალდებით დააკავეს.
ლგბტ აქტივისტები დააკავეს ქუჩაში სტენსილების გაკეთების გამო, ისინი განყოფილებაში ჰყავთ გადაყვანილი. ,,როგორც შემატყობინეს პოლიცია იქცეოდა და იქცევა ძალადობრივად: ქუჩაში ძირს ახოხიალეს აქტივისტები, ფიზიკურად შეეხნენ და იყვნენ ძალიან აგრესიულები. ამ წამს მე და ნინო ბოლკვაძე გავდივართ იმ განყოფილებაში, სადაც ისინი არაიან. როგორც გავიგე ორტაჭალაში ჰყავთ ძველი თბილისის პირველ ან მესამე განყოფილებაში - მისამართს არ ეუბნებიან წესიერად და ტელეფონში ძლივს მოასწრო ერთ-ერთმა აქტივისტმა უცბად მისამართის თქმა და ტელეფონიც ჩამოარეთვეს. უშიშროების თანამშრომლები უკვე ატერორებდნენ და ემუქრებოდნენ რამდენიმე ლგბტ აქტივისტს ამ დღეებში. ეხლა კიდევ ეს! ეს არის სახელმწიფოს მხრიდან განხორციელებული რეიდი და ტერორი ლგბტ აქტივისტებზე წელს! – წერს ფეისბუკის საკუთარ გვერდზე “ლგბტ საქართველოს” აღმასრულებელი დირექტორი ლევან ბერიანიძე.
არსებული ინფორმაციით, დაკავებულებმა სხვადასხვა ფერის საღებავით შეღებეს რამდენიმე შენობა, მათ შორის საპატრიარქოს კედლები.
როგორც ”ნიუპოსტს” შინაგან საქმეთა სამინისტროში განუცხადეს, 10 პირის დაკავება ადმინისტრაციულ სამართალდარღვევათა კოდექსის 150-ე მუხლის საფუძველზე მოხდა, რაც ადმინისტრაციული თვითმმართველი ერთეულის იერსახის დამახინჯებას გულისხმობს.
შს სამინისტროს პრესსამსახურის ინფორმაციით, დაკავებულთაგან რამდენიმე პირს ბრალად პოლციისთვის წინააღმდეგობის გაწევა ედება. (173-ე მუხლი).
დღეს ჰომოფობიასა და ტრანსფობიასთან ბრძოლის საერთაშორისო დღეა. 17 მაისი არის დღე, როდესაც მსოფლიოს ჯანდაცვის ორგანიზაციამ განსხვავებული სექსუალური ორიენტაცია დაავადებათა კლასიფიკაციიდან ამოიღო. ეს მოხდა 1990 წელს. 17 მაისის აღნიშვნა მსოფლიოში 2004 წლიდან დაიწყო.

საქართველოში 17 მაისი უკვე რამდენიმე წელია რაც აღინიშნება. წელს ლგბტ აქტივისტები საჯარო შეკრებას არ გამართავენ, მათი თქმით მიზეზი სახელმწიფოს მხრიდან მათთვის უსაფრთხოების გარანტიების ვერმიცემაა.