"თქვეს, რომ ფხიზელი ადამიანები მანქანებზე არ დაძვრებიან"- რას აცხადებს გათავისუფლებული ნატა ფერაძე

სამართალი - 21:10, 07 May, 2016

7869

„პანორამა თბილისის“ მშენებლობის წინააღმდეგ გამართულ აქციაზე დაკავებული ნატა ფერაძემ, ხელწერილით გამოშვების შემდეგ კომენტარი გააკეთა. მისი თქმით მან არ იცის რა პრონციპით გადაწყვიტა პოლიციამ მისი ნარკოლოგიურში გადაყვანა:

„ხელწერილის საფუძველზე გამათავისუფლეს, სადაც წერია, რომ პოლიცია დამიკავშირდება და გამოვცხადდები სასამართლოში.. გადმომიყვანეს ნარკოლოგიურში. არ ვიცი რა პრონციპით თქვეს, რომ ფხიზელი ადამიანები მანქანებზე არ დაძვრებიან და ამიტომ შემარჩიეს ნარკოლოგიურში გადმოსაყვანად. მომთხოვეს ბიოლოგიური მასალის ჩაბარება, რაზეც რა თქმა უნდა უარი განვაცხადე“- განაცხადა ნატა ფერაძემ "კურიერთან"

ადვოკატის ნონა ქურდოვანიძის ინფორმაციით, ნატა ფერაძეს ბრალი არ აქვს წარდგენილი არც ერთი სისხლის სამართლის მუხლით და მისი დაკავების ოქმში მითითებული იყო მხოლოდ ერთი, ადმინისტრაციულ სამართალდარღვევათა კოდექსის 173-ე მუხლი (პოლიციელის კანონიერი განკარგულებისადმი ან მოთხოვნისადმი დაუმორჩილებლობა). ადვოკატის თქმით, ჯერ უცნობია, როდის გაიმართება ამ საკითხზე სასამართლო სხდომა.

შსს-მ დღეს გაავრცელა ინფორმაცია, რომ ნატა ფერაძე დაკავებული იყო ადმინისტრაციულ სამართალდარღვევათა კოდექსის 173-ე (პოლიციელის კანონიერი განკარგულებისადმი ან მოთხოვნისადმი დაუმორჩილებლობა) და 45-ე (ნარკოტიკული საშუალების ექიმის დანიშნულების გარეშე მოხმარება) მუხლებით და მის მიმართ ასევე დაწყებული იყო გამოძიება პატრულ-ინსპექტორისთვის ფიზიკური შეურაცხყოფის მიყენებისა და პოლიციის მანქანის დაზიანების ფაქტებზე, სსკ-ის 125-ე (ცემა) და 187-ე (ნივთის დაზიანება ან განადგურება) მუხლებით.