"პროკურატურამ ზღაპარი შეთხზა, ეს ცილისმწამებლური კამპანიის ლოგიკური შედეგია"- გია უდესიანის და

სამართალი - 17:16, 05 May, 2016

3707

ბიზნესმენ ბესიკ ხარძიანის წამებისა და ქონების გამოძალვის ფაქტზე გიორგი უდესიანის მიმართ სისხლის სამართლებრივი დევნის დაიწყებას მისი და ნატო უდესიანი ცილისმწამებლური კამპანიის გაგრძელებად აფასებს და აცხადებს, რომ მის ძმას გააჩნია ყველა ცილისმწამებრულ ბრალდებაზე უდანაშაულობის დამადასტურებელი მტკიცებულება.

"გია უდესიანის მიმართ სისხლის სამართლებრივი დევნის დაწყება იმ ცილისმწამებლური კამპანიის ლოგიკური შედეგია, რომელიც წლების განმავლობაში მიმდინარეობდა. გია უდესიანს სისულელეს ედავებიან. პროკურატურამაც მორიგი ზღაპარი შეთხზა. ჩვენ ვცხოვრობთ არა სამართლებრივ ქვეყანაში, გია უდესიანის მიმართ რაიმე ბრალის წაყენება თუ უნდოდათ, ამას არ ჭირდებოდა 4 და 5 წელიწადი, ახლა მოდის არჩევნები, დიახ მე ვუკავშირებ პოლიტიკურ პროცესებს, არჩევნების პერიოდს, რაღაცით უნდათ კიდევ გადაფარონ რაღაცა. ყიდვა-გაყიდვაში კუს ტბის წილებთან დაკავშირებით უდესიანი საერთოდ არაფერ შუაში იყო, ამაში ჩართული იყო უცხოური ფირმა. ასევე საზოგადოებამ ნახა ვიდეოფირები, რომელშიც ბესო ხარძიანის ოჯახის წევრები არა ერთხელ იყვნენ მისული გია უდესიანთან და მას თხოვდნენ დახმარებას“, - განაცხადა ნატო უდესიანმა.

საქართველოს მთავარმა პროკურატურამ კუს ტბის წილების იძულებით დათმობის მიზნით, ბიზნესმენ ბესარიონ ხარძიანის წამებისა და ქონების გამოძალვის ფაქტზე, ყოფილი თანამდებობის პირის, გიორგი უდესიანისა და სასჯელაღსრულების დეპარტამენტის მე-2 საპყრობილის ყოფილი დირექტორის, ალექსანდრე მუხაძის მიმართ სისხლის სამართლებრივი დევნა დაიწყო. აღნიშნულთან დაკავშირებით უწყებაში განცხადება დღეს გაკეთდა.